Независно дали рекреативно сте навлечен на вежбање, фитнес и спорт, или сте профи кој го вади лебот на терен, знајте дека токму принципот на баланс помеѓу 5те елементи (аеробни вежби, вежби за сила, балансот (рамнотежа), флексибилност и кор стабилити) во правилна дозираност (со специфика на спортот за профи спортистите) ќе ги подобрат вашите перформанси со сигурност. Бидете решителни и внесете ги во вашите тренинзи и тренинг програми.

Аеробен фитнес или уште попознат како кардио или тренинг за општа издржливост е база скоро на секој програм. Овој тип на тренинг ви овозможува подобра адаптација на повеќе физиолошки нивоа. Овозможува да дишете поефикасно, да имате побрза размена на материи и кислород во крвта, а воедно ја подобрувате кардио-васкуларната издржливост.

Овој тип на тренинг ги ангажира големите мускулни групи и го става срцевиот мускул во вонреден погон. Ако сте рекреативец можете да пробате со одење, џогирање, возење велосипед, пливање, танцување физичка работа по дома и мал милион други активности. Целете на 30тина минути дневно како одлична база за здраво и подготвено тело за предизвик и запомнете често да го менувате интензитетот.

Силов тренинг Ова е друг столб за градењето на супер конструкција кај секој поединец и не треба да го запоставите или отфрлите. Силов тренинг минимум 2 пати во неделата може да делува освен на мускулите, и на цврстината на коскената маса, да стимулира одредени реакции во телото со што вие ќе имате само бенефит.

Особено важно е повозрасните жени да имаат континуитет  во оваа компонента за да превенираат губење на коскената маса (остеопороза) во менопаузата. Освен тоа со силовиот тренинг ќе се чуствувате помоќно, посамоуверено и подготвено.

Кор стабилити се вежби за мускулниот комплекс на абдоменот, половината и карлицата кој имаат за цел да ја зајакнат спојката помеѓу екстремитетите и да превенираат било каква повреда на најчесто слабите зони во овој дел од телото (`рбетот во лумбалниот дел, ингвиналниот канал на абдоменалниот ѕид).

Овие вежби ги прават мускулите многу поиздржливи и посилни и во спортските движења претставуваат основа за изведување на технички елементи. Можете да ги изведувате без помагала, но доколку сакате да имате потемелен ефект можете да ги искомбинирате со како физиотопка, елек со тегови, босу  и други.

Баланс тренинг е особено важен кај профи спортистите за подобра реакција, правилна дистрибуција на тежината на телото врз екстремитетите, превенција од повреди, а кај постарите лица за превенција од несакани падови и фрактури бидејќи со староста балансот се нарушува доколку не се стимулира дополнително. Вежбите за баланс можете да ги изведувате со и без помагала. Главната поента е да го принудите телото да одржува баланс на нестабилни површини, босу , балансери, баланс дискови, штици.

Тренингот за флексибилност и стречинг  се исто така важен дел за да ги максимизирате движењата и превенирате разни мускулни повреди. Некој спортски дисциплини изискуваат повеќе флексибилност од други. Овие вежби ќе ја подобрат флексибилноста на мускулите и ќе го зголемат потенцијалот во зглобовите и ќе овожможат поголема ефикасност во движењата. Исто така овие вежби ќе помогнат во брзото закрепнување од напорни тренинзи и натпревари и ќе го намалат стресот.

За крај без разлика дали програмата за вежбање ќе ја направите вие или ќе побарате помош од тренер, гледајте сите овие елементи да бидат застапени за да имате комплетна стимулација на вашето тело, а не само парцијално да го задоволувате.