Китка Треил Ран – Прва планинска трка на падините на Китка
12:00 - 09 Окт 2018
Овој викенд на 14 октомври 2018 ќе се одржи првото издание на трката Китка Треил Ран каде учесниците ќе имаат можност да трчаат на две патеки во должина од 14 и 28 километри. Есенските бои на Китка се веќе во полн ек, а организаторите ги очекуваат првите тркачи на Китка.
Китка Треил Ран е прва планинска трка која ќе се одржи на територија на Кисела Вода и на падините на планината Китка која е во непосредна близина на градот Скопје. Двете трки кои се закажани се Шпела Ран – 14 километри со 400 метри висинско искачување каде се посетува селото Вртекица и пештерата Шпела.
Подолгата и потешка стаза наречена Китка Ран е во должина од 28 километри и 1350 метри висинско искачување каде се оди во највисоките делови од планината, до врвот Китка, планинарскиот дом Китка и селото Вртекица.
Стартот и финишот на двете трки е од месноста Три Круши во Драчево, Китка Ран ќе стартува во 9 часот а Шпела Ран во 10 часот.
Пријавувањето ќе биде отворено до 10.10.2018 на следниот линк
Трката е во организација на ПСК „Драчево – Филип Чакаров” во коорганизација со здружение Трекс од Скопје и Општина Кисела Вода. 
