Официјалната потврда за успешното искачување пристигна од веб сајтот explorersweb.com кој пренесува најнови вести од искачувањата на големите врвови низ светот.

Во објавата за американскиот и финскиот тим кој успешно го искачиле К2 некаде утрото на 27.07. беше ажурирана и веста за интернационалниот тим составен од Иранецот Реза Шахале, нашиот Здравко Дејановиќ и Шерпасот Мингма Гајле кои исто така успешно се искачиле дента и се на симнување.

„Денеска (27 јули) сите членови на нашиот тим успешно се качија“ – била пораката од интернационалното трио.

К2 (8,611 м.н.в) е вториот највисок врв на земјата кој е сместен во Пакистан и тој заедно со Анапурна (8,091 м.н.в) се сметаат за најтешките и најсмртоносните врвови на светот. Здравко имаше еден неуспешен обид за качување на К2 и минатата година, но 2014 се покажа за поуспешна. Во своето резиме тој има и други бројни високи врвови како Монт Еверест, Аконкагва и др.

Му посакуваме безбедно симнување и враќање во Македонија.