Активности наменети за претшколска и школска возраст ќе бидат организирани низ речиси сите градови во Македонија во форма на традиционални игри и игри без граници, додека во Скопје во неколку домови за стари лица ќе бидат организирани теоретски предавања за бенифициите од активниот живот и часови по утринска гимнастика. На падините на Водно, ќе биде организиран и отворен ден за параглајдинг, каде учесниците можат одблиску да се запознаат со специфичностите на овој спорт.

Исто така, преку различни спортски активности ќе бидат вклучени и децата без родители, пензионерски друштва, лицата со посебни потреби и многу други. Целта на оваа иницијатива е да се следат Европските практики во промоција на физичката активност преку неделата на движење, и да се поттикне населението без разлика на возраста да се бави со рекреативен спорт и физички вежби кои ја зајакнуваат и подобруваат целокупната здравствена состојба.