Иако постојат некакви воспоставени “правила” за тоа кога е најдобро да го направите вашиот тренинг, сообразувајќи се со вашиот биолошки часовник (Circadian Rhythms) не секогаш времето, обврските, оброците и желбата се во соодветен распоред за да извлечете максимум од Вас.

Иако ќе наидете на многу информации за нивото на вашите хормони, дека се највисоки во два наплива во текот на денот, првиот наплив е 3 часа од вашето будење, а вториот е 11 часа од будењето, секогаш земете ги податоците со резерва, бидејќи овој ритам не е толку прецизен и темелен.

Не е сеедно дали сте спиеле 8 или 5 часа, не е сеедно кога бил вашиот последен оброк и дали бил квалитетен. Не е сеедно дали сте свикнале или правите утрински џогинг за првпат во 6 наутро.

Теориите за некакво трајно воспоставување на ритамот на биолошкиот часовник од млада возраст паѓаат во вода бидејќи многу нови истражувања укажуваат на тоа дека врз оваа матрица многу лесно може да се влијае и да се менува во зависност од вашата животна динамика и потреби.

Еден таков 24-часовен циклус е во зависност и влијае на многу системи и телесни функции (срцев ритам, крвен притисок, тонус, ниво на хормони, телесна температура, метаболизам) а со тоа и на енегетските нивоа на телото.

Стивен Алдана, професор од секторот за спортски научни истражувања при универзитетот во Прово, Јута  дава совет за опцијата сами да направите сопствен експеримент за да одлучите кога е најдобро време за тренинг. Пробувајќи тренинг наутро, попладне и приквечер во подолг период од неколку недели за да можете да заклучите во кој дел од денот се чувствувате најпозитивно за време и после самиот тренинг.

Она што многу професионални спортисти го користат како практика е да го темпираат времето на тренинзите со времето на натпреварот кој што треба да им донесе некаков позитивен резултат. Па доколку сакате да истрчате добро време на некој маратони кој најчесто се со старт во утринските часови, а вие со месеци сте тренирале во сосем друго време од денот, веројатноста е голема дека нема да го постигнете резултат кој што би го постигнале доколку сте тренирале наутро. На овие тврдења се надоврзуваат истражувања направени од Универзитетот во северен Тексас, Дентон со кој се потврдуваат ставовите дека Биолошкиот часовник на најразличен начи со помош на аларм,оброци, тренинзи може да се измени и темпира.

Тренинг наутро на гладен стомак ќе помогне да ги таргетирате масните наслаги како извор на енергија, но доколку правите интензивни тренинзи, а притоа не внесете доволно протеини ќе губите од вашата мускулна маса, затоа придржете се на лесен кардио тренинг наутро доколку целта ви е да го намалите масниот баласт. Но доколку изведувате друг тип на тренинзи внимавајте на тренинг дозите и храната.

Силовиот тренинг е особено важно да го направите откако ќе внесете два главни оброка во текот на денот за да го максимизирете ефектот. И секогаш имајте на ум дека за да постигнете резултати одморот е клучен фактор особено пред тренингот.

За тренингот касно навечер се смета дека може да предизвика потешкотии во спиењето особено ако е интензивен па затоа внимавајте да има доволно време, најмалку час и половина телото да се смири пред да легнете.

Попладневниот тренинг се смета за најефикасен затоа што температурата на телото е највисока, што за многумина е периодот околу 5 часот попладне (температурата на телото е најмала веднаш по будењето). Воедно и силата е за 5% поголема во овој период од денот, и анаеробните перформанси се поголеми за 5%.

Аеробните капацитети се за 4% повисоки во попладневниот период, каде и мускулатурата е пофлексибилна и со повисока температура што индиректно е превентивен фактор од повреди.

Земајќи ги во предвит сите овие подробности, не треба да заборавиме на индивидуализирањето на секој тренинг односно време за тренинг кај секој поединец, во зависност од дневните обврски, од метаболизмот и ред други фактори кој се играат улога во секојдневието.