Нашиот најуспешен млад шахист

Наслов

Ексклузивно интервју со Тони Лазов

Шах-мат, им кажа Тони на многу негови врсници, но и на повозрасните кои го предизвикаа на досегашните натпреварувања. Идниот македонски Каспаров, член на ШК Алкалоид од Скопје, одвои дел од своето време за да си помуабети со тимот на karas4training.com. 

Тони Лазов

К4Т - Се сеќаваш ли на почетоците? На твоите први партии шах?
ТЛ - Шах научив да играм на шест години. На почетокот играв со дедо ми, потоа со татко ми. Првите турнирски партии ги одиграв на шест и пол години, на пионерското првенство на Неготино.
Првиот голем успех го постигнав на седум години кога го освоив првото место до осум години на пионерското првенство на град Скопје.

К4Т - Кој те воведе во шахот?
ТЛ - Основата на шаховската игра ми ја даде мојата стрина Емилиа Ларачеа која и самата има постигнато големи успеси во светски рамки како млада шахистка. Таа ме воведе во тајните на шахот, ме научи да играм според правилата, тренираше со мене и ме подготвуваше за натпреварувања.

К4Т - Веднаш ли те привлече или откога подобро навлезе во играта?
ТЛ - Шахот како игра ме привлече уште во првиот момент, кога видов како стрина ми ја учи сестра ми да игра. Веднаш посакав да научам и јас.

К4Т - На колку натпреварувања си учествувал?
ТЛ - Имам учествувано на многу натпреварувања, сигурно повеќе од 50. Имам и десетина поголеми меѓународни турнири, меѓу кои и учества на Европски и Светски првенства. Веќе не ги бројам натпреварувањата, туку само поголемите успеси.

К4Т - Кои се твоите најголеми достигнувања досега?
ТЛ - Од меѓународните натпревари би ги издвоил следниве: Прво место на Првенството на Југоисточна Европа за млади до 10 годени во Р. Србија; Шесто место на Европското првенство во забрзан шах до 12 години и осмо место во брзопотезен шах до 14 години во БиХ; Солидно е и 43-тото место од 192 учесници на Светското првенство до 12 години во Р. Словенија.
На домашната сцена веќе 5 години по ред сум државен првак во своите категории. Сепак, најголемиот успех досега го постигнав пред 4 месеци кога на Отвореното меѓународно првенство на Македонија (за возрасни) го освоив четвртото место.

К4Т - Како се подготвуваш пред натпревар?
ТЛ - За големите натпреварувања подготовките почнуваат неколку недели порано, а пред самите партии, кога има доволно време, повторувам одредени варијанти.

К4Т - Колку партии во просек играш дневно?
ТЛ - Кога некој сериозно се бави со шах не игра секој ден. Постојат периоди на учење - кога учам нови отварања и сл; периоди на вежбање - кога решавам комбинации или гледам партии од познати шахисти; и постојат периоди на рекреативно играње кога знам да одиграм и 20 - 30 брзопотезни партии на интернет. Сепак, вистинските шаховски партии кои ги играм на сериозните турнири траат доста долго. Во просек една таква партија трае 4 - 5 часа.

К4Т - Имаш ли редовен партнер за игра или вежбаш на компјутер?
ТЛ - Обично играм шах на интернет, а компјутерот го користам за анализи и учење. Но најголема помош добивам од мојот тренер - шаховскиот велемајстор Трајко Недев, со кого редовно вежбам веќе неколку години.

К4Т - Се занимаваш ли со друг спорт/дисциплина освен со шах?
ТЛ - Да. Сакам редовно да се раздвижувам. Многу го сакам спортот, а од спортовите кои ги играм омилени ми се пинг-понг, кошарка и фудбал.

К4Т - Кое отварање во шахот најмногу ти лежи?
ТЛ - Најмногу сакам да играм Шкотско отварање и Гринфилд, но исто така ги сакам и Руското отварање и Италијанското.

К4Т - Која ти е омилена фигура?
ТЛ - Кога бев мал омилена фигура ми беше кралицата. Сега подеднакво играм со сите.

К4Т - Кој ти е омилен шахист?
ТЛ - Каспаров од поранешните, Арониан од актуелните шахисти.

К4Т - Играш ли шах со другарчињата?
ТЛ - Не. Но понекогаш со деца играм симултанки на 10 - 12 табли.

К4Т - Какви се твоите импресии од Светското првенство во Марибор?
ТЛ - Натпреварувачки не беше лесно. На светските првенства сите доаѓаат да се натпреваруваат и да победат. Сите се силни. Таму нема слаби. Успехот што го постигнав беше солиден, иако можев и многу подобро. Ова ми беше трето учество на светско првенство и прв ваков успех. На претходните две играв послабо. Овој напредок ме охрабри и верувам дека следниот пат ќе остварам уште подобар пласман.
Интересно беше тоа што се запознав и комуницирав со деца од сите страни на светот. Со некои од нив почнав да се допишувам.

К4Т - Кое ти е следното натпреварување?
ТЛ - Три дена после Светското првенство учествував на Државното првенство на Македонија во шах за основни училишта и го освоив првото место. Изминатиот викенд учествував на Отвореното првенство на Скопје и освоив награда за најдобар младинец до 18 години. Овој викенд ме очекува уште еден турнир - Рапид отворен турнир „Македонија 2012" кој ќе се одржи во хотел Александар Палас во Скопје. Со тоа завршуваат турнирите за оваа календарска година.

К4Т - Би сакал ли професионално да продолжиш со шахот?
ТЛ - Да. Верувам дека ги имам сите квалитети за да можам да станам силен велемајстор и да играм на светски познати турнири.

 

Ти благодариме Тони и ти посакуваме уште многу успеси! 

 

Повеќе информации за тоа каков удел има шахот при развојот на младите можете да прочитате ТУКА.

 

07 Декември 2012

За авторот