Витаминот Д претставува дел од липосолубилната (растворлива во масти) група на витамини К – А – Д – Е. Тоа значи дека по внесувањето во организмот, потребни се масти за негово врзување и соодветно апсорбирање во организмот, a дополнително истиот може да се синтетизира и ендогено – во кожата под дејство на УВ зраците од сонцето. 

Покрај широко познатите знаења за влијанието на витаминот Д врз здравјето на коските преку регулирање на концентрациите на калциум и фосфор во телото, тој е доста важен и за правилно создавање на клетките во телото, влијае врз соодветната невромускулна и имуна регулација и е важен во смирувањето на процесите на инфламација. 

Нова интересна студија на тема која ги поврзува атлетските перформанси и дефицитот на овој витамин, пак, открива нова страна на неговото влијание. Студијата извршена на Универзитетот Тулса со своите резултати покажа дека дефицитот на витаминот Д енормно ги влошува фитнес резултатите на поединци тестирани за различни силови вежби. 

Имено, студијата следела 100 студенти, од кои една третина биле со воспоставен (серумски измерен) недостаток на витамин Д. Вежбите т.е. тестовите на кои биле подложени меѓудругото биле едно чучнување со максимална тежина (one-rep max), спринтови, скокови во височина и далечина. Со други зборови биле одбрани вежби каде најмногу е потребна сила и експлозивност. 

Резултатите покажале дека овие атлети со дефициенција на витаминот Д во нивниот организам имале: 77% полесна максимална тежина со која можеле да направат едно макс чучнување, спринтовите им биле 18% поспори, скоковите во далечина 80% пократки, а во вертикала 15%. Научниците ги толкувале резултатите како доволни да се даде заклучок дека во овој конкретен случај, недостатокот на витамин Д имал доста значаен импакт врз намалувањето на ефективноста на истите при тренингот.

Како можно толкување за ефектот, научниците сметаат дека се работи за влијанието на витаминот Д врз калциумовиот јон кој е важен при контракција на мускулите. 

И тука доаѓаме до прашањето како и колку да го внесуваме витаминот Д?

1. Истиот најмногу се наоѓа во масните риби (туна, лосос, скуша, сардина итн.), рибиното масло (како суплементација), некои видови на печурки изложени на дневна светлина, тофу, млечни производи, јајца, а поради неговата ограниченост голем број на држави го имаат како задолжително „засилување” на одредена храна како корнфлексите и млекото. 

2. Како втора важна варијанта за негово добивање е сончањето. Практикувајте го во умерени периоди кога имате можност.

3. Препорачаните дневни дози за просечен маж и жена се 600 IU на ден. Горна граница за овој витамин е 10000 до 40000 IU на ден. Колку за ориентација 100 грама млечни производи ви даваат само 18% до препорачаните дневни вредности, додека 100 грама риба – 130%.