Наслов

Знаеш дека ти фали протеин кога...

Протеинот е клучен макронутриент без кој човековото тело не може да функционира. Неговата улога во животот на активните луѓе е уште поважна а евентуалниот недостаток може да има негативни последици врз тренингот и здравјето воопшто.

Количината на протеин која му е потребна на човековото тело варира според индивидуалните потреби на поединецот и истите варираат од 0.9гр по телесен килограм (според СЗО) па се до 2 и повеќе грамови во зависност од спортот со кој се бавите. Од количината на протеин и неговиот квалитет зависи во колкава мера ќе се опоравуваме од тренинзите и во колкава мера ќе имаме напредок во она што го тренираме.

Со оглед на модерното време и начинот на живот кој го живееме веројатноста да бидеме дефицитарни со количините на овој нутриент се многу веројатни и покрај тоа што калориски најчесто сме во голем суфицит кој пак најчесто доаѓа од шеќери. Честопати, брзата и процесирана храна е најлесниот извор за маскирање на гладта, но она за што вистински е гладно спортското тело е протеин.

Еве неколку состојби кои доколку ги забележите кај себе можат да претставуваат знак дека вашата дневна потреба за протеин веројатно е поголема од онаа што ја конзумирате во моментот.

1.Намален перформанс- првото поле на кое ќе се почуствува дефицитот од протеин е тренингот. Без разлика на трудот кој го вложувате, резултатите ги нема. Диета која не ги задоволува оптималните потреби за протеин може да предизвика мускулна атрофија.

2.Анксиозност и депресија- ако се чуствувате раздразливо или постојано избувнувате, имате проблем со несоница или нестабилен сон, можеби е време за да го зголемите дневниот внес на протеин. Протеините му помагаат на мозокот полесно да ги синтетизира хормоните кои прават да се чувствувате смирено и позитивно, како на пример серотонинот.

3.Чести повреди- недоволната количина на протеин во исхраната го зголемува ризикот од губење на мускулната маса, споро закрепнување на микрофрактурите на коските што пак доведува до мускулна-склетена слабост, фрактури и остеопороза. Исто така протеинот е клучен во абсорбцијата на калциум. Клучниот минерал за здрави и силни коски.

4.Зголемен апетит- постојаната потреба да се посегне по некоја ужина полна со калории, може да биде директна последица од недостаток на протеин во исхраната, а зголемен внес на прости јаглехидрати. Протеинот кој е оптимално застапен во секој оброк го стабилизира нивото на шекер во крвта и ја подобрува дигестијата. Доколку пак постојано имате потреба од некој богат протеински оброк како јајца, месо или млечни производи, послушајте го вашето тело и дајте му го она што му е потребно.

5.Други знаци- доколку вашето тело има недостаток на протеин, мошне е веројатно истото да почне да "снабдува" протеин од деловите на телото кои не се толку важни како: нокти, коса и така натаму. Ако почустувавте дека косата ви станува оштетена и или пак ноктите ви изгледаат болно, време е да направите измени во вашата секојдневна исхрана. 

24 Јуни 2019

За авторот