Наслов

Растителни протеини како база за квалитетна исхрана

Не треба да бидете вегетаријанец или веган за да им дадете предност на растителните протеини пред животинските. На избор имате огромна палета на производи кои пред сè се здрави, но и вкусни.

Покрај тоа што можете да си ја добиете целосно потребната доза на протеини базирајќи се само на растенија, овие неколку факти дополнително ќе ве натераат да им најдете место пред животнските протеини.

Високото ниво на заситени масни киселини во исхраната се поврзува со кардиоваскуларни заболувања. Исхраната богата со месо, млечни производи и јајца изобилува со заситени масни киселини, но од друга страна диетата која се базира на растителна храна изобилува со незаситени масни киселини (јатките и семките) кои се здрави за срцето.

2 Модерната месна индустрија го става квантитетот пред квалитетот заради поголем профит. Често на трпеза заедно со стекот добивате и вакцини, антибиотици, хормони за раст.

3 Во однос на месото кое формира кисела средина, растителните протеини најчесто формираат алкална. Се смета дека алкалноста на храната помага во намалување на воспалителните процеси, го намалува стресот и ги одржува коските здрави и солидни.

4 Освен протеини, со растителната храна внесувате и доза на диетални влакна кои ја подобруваат дигестијата, ги решаваат проблемите со варењето на храната и имаат уште многу многу други полезни функции. Всушност експертите го посочуваат недостатокот на диетални влакна во исхраната како посериозен проблем за разлика од недостаток на протеини.

Ако во предвид го земете фактот дека месната индустија е веднаш по автомобилската како загадувач, можеме да заклучиме дека земјата би била далеку помалку загадено место за живеење ако се ориентираме кон растенијата и растителните протеини како прехрамбена основа.

Се што треба да направите е да ја посетите вашата омилена продавница за здрава храна и да си набавите некои од следните производи кои изобилуваат со растителни протеини. Искажаните вредности се на 100 грама од производот.

СЕМЕ ОД КОНОП

По својот протеински состав конопот се споредува со млекото, јајцето, месото и сојата. Од конопово семе добивате 37 грама протеини, а бонус во овој протеински извор се омега- 3 и омега-6 масни киселини чиј однос е речиси оптимален.

КИНОА 

Житарка која освен голема доза на диетални влакна и железо има и солиден протеински состав. Во една порција зготвена киноа добивате 4 грама протеини. Во комбинација со зеленчук и семки оваа бројка може да се дуплира.

ХЕЉДА 

Без разлика дали е подготвена како каша или смелена како брашно за палчинки, обезбедува околу 13 грама протеини. Хељдата исто така ја подобрува циркулацијата и го намалува нивото на холестерол во крвта.

БИО СОЈА 

Во вид на тофу или темпех од соиниот протеин добивате 18 грама. Бидејќи станува збор за одлична протеинска ризница, а во голем дел производите се од генетски модифицирани зрна, купувајте само од продавници кои нудат висок квалитет и храна која не содржи ГМО, а купувањето на био соја ви го гарантира тоа.

ЧИА 

Овие семчиња обезбедуваат 16 грама протеини, а пудингот со чиа е вистинска гозба за после вежбање бидејќи освен протеините кои во тој период му се најпотребни на телото, чиата содржи и одлични дози на калциум и антивоспалителни омега-3 масни киселини.

СЕЈТАН 

Производ богат со глутен, па затоа се избегнува кај луѓе кои боледуваат од целијакија или се интолерантни. Но за сите останати е мега извор на протеини со речиси 75 грама протеини на 100 грама сејтан.

СПИРУЛИНА 

Обезбедува 57 грама протеини заедно со уште многу витамини, минерали и фитонутриенти, што е одлично за додаток во вашиот шејк.

ЛЕГУМИНОЗИ 

Гравот, грашокот, леќата, наутот даваат одлична протеинска доза, а речиси секогаш ги имате при рака, пријателски се настроени кон домашниот буџет, а освен тоа можете да ги употебите во огромен број рецепти.  Во просек од легуминозите добивате околу 12 грама протеини, но сепак во најголемо водство е гравот. На пазарот можете да најдете и концентриран протеин од грашок направен со процес на екстракција и пречистување на протеинот од грашок со концентрација на 82% во овој производ.

Постојат неколку митови токму околу протеините, како еден од трите макро-нутриенти заедно со мастите и јаглехидратите, кои никако не замруваат. Прво, исхраната која се заснова на растителни протеини е целосно доволна и компатибилна потребите на еден возрасен човек за аминокиселини. Второ, недостаток на протеини или на поедини аминокиселини се заработува единствено при исхрана базирана само и единствено на овошје.

Затоа, со култ на здрава и балансирана исхрана можете да ги добиете сите потребни калории, макро и микронутриенти во текот на денот.

02 Јули 2015

За авторот