Наслов

Чести грешки во исхраната за време на полу/маратон

Без разлика дали сте искочиле само на тренинг или пак треба да настапите на трка, исхраната и хидратацијата пред да стапнете на стазата може да ви помогнат да го постигнете својот личен рекорд или да ви одмогнат да ја постигнете поставената цел. Следуваат неколку грешки во исхраната кои може трката да ви ја претворат во убав спомен или во кошмар...

Погрешно го темпирате појадокот?!

Појадокот пред трка е задолжителен оброк. Но сепак ако појадувате премногу доцна, постои ризик од стомачни грчеви, болки и срцебиење, а енергијата која нормално ќе ви биде потребна за трчање телото ќе ја насочи кон дигестија на храната.

Оброкот изедете го барем 2-3 часа пред трката, со тоа што ако трчате 5 километри, ќе ви бидат доволни околу 200 калории, а ако трчате подолго внесете околу 500 калории. Дополнителни јаглехидрати во помал волумен (на пример банана) може да изедете најдоцна 60 минути пред стартот.

Составот на „победничкиот појадок“?!

Иако омлетот звучи како појадок кој ќе ви даде доволно сила да за стигнете до целта, сепак премногу протеини, маснотии и диетални влакна пред трката може да дадат сосема спротивен резултат.

Најдобар избор се лесно сварливи јаглехидрати како на пример овесна каша со банана, ѓеврече со путер од кикиритки, 2-3 парчиња леб и џем.

Претерувате со течности?!

Колку што дехидрираноста може да ја уништи трката, толку може и потребата од тоалет. Премногу вода, без додатни електролити, исто така може да доведе до појава на хипонатремија (недостаток на натриум) на долги трки. Бојата на урината може да ви биде индикатор. Таа треба да биде светло жолта, ако нема боја значи сте претерале со водата.

Испијте помеѓу 500 и 750 мл вода час и половина пртходно, а остатокот од 250 мл испијте го пред трката. На топли и влажни денови малку зголемете ја милилитражата на течности.

Претрчувате покрај штандовите со храна и пијалок?!

За време на трка, најчесто заради еуфоријата нема да чувствувате глад, туку истиот ќе се манифестира преку грчеви, болки, вртоглавица...

Не мора да се прејадувате или да пиете многу вода, но голтнете неколку голтки и каснете барем еден залак. Ако во моментот се чувствувате одлично, можеби неколку километри понатаму ќе биде веќе доцна да земете дополнителна калорија или течност.

По трката завршувате на шанк?!

Грч ладно пиво звучи како заслужена награда по истрчаните километри. Сепак алкохолните пијалоци кои имаат благо диуретично својство може да ја продлабочат дехидратацијата, а хранливата вредност на пивото е далеку од потребната за правилна регенерација на мускулите и надополнување на истрошените гликогенски депоа.

Ќе зацелите побрзо и подобро ако 30-60 минути по трката изедете нешто навистина хранливо, а потоа секако пивото ви е заслужено!

14 Април 2015

За авторот

Најнови членови

На Facebook