Прво да ги расчистиме психостимулативните догми околу коноповото семе. Конопот кој што се користи за исхрана и производство на текстил, хартија материјали за градежништво и растението од кој се добива марихуана имаат исти предок и нивните сличности завршуваат тука. Количината на ТХЦ (D-9-тетрахидроканабитол) што ја содржи конопот наменет за консумирање е од занемарувачки размери и не се детектира на тестовите за дрога. Со други зборови консумирате онолку ТХЦ од коноповото семе, колку што консумирате опиум во грисините со мак.

Она што ние го нарекуваме семе од коноп е всушнот плодот на коноповото растение кој е ситен и зрнест, па заради изгледот го добива називот семе. На пазарот можете да наидете на семе од коноп со и без лушпа, каде првото е наменето за ‘ртење или е потребно да се смели пред да се консумира, протеински прав од коноп, млеко од коноп, разни производи со конопово семе.

Најкарактеристично обележје по кое конопот е познат во нутритивните кругови е протеинскиот состав во ова навидум обично семе. По својот протеински состав конопот се споредува со млекото, јајцето, месото и сојата и претставува комплетен протеин т.е. ги содржи сите есенцијални амино киселини. Се вбројува во погодни извори на протеини за вегетаријанци и вегани.

Остатокот во најголем дел го сочинуваат масни киселини како омега 3 и омега 6 кои покажуваат антиинфламаторни карактеристики, се смета дека го подобруваат менталното здравје, но исто така го намалуваат и ризикот од развој на деменција кај постарите лица. Битно е да се назначи дека односот на овие две есенцијални масни киселини во коноповото семе е речиси оптимален.

• Коноповото семе за разлика од повеќето други легуминози, јатки и семиња не содржи анти-нутрициенси. Повеќе на овој линк.