An apple a day keeps the doctor away

Наслов

Едно јаболко дневно ја загрозува докторската платa по учинок

Го знаете тој синдром ако нештото го има во изобилие не е баш интересно. Можеби јаболката не добиваат толкава слава како "суперхраната" гоџи, акаи, ацерола... Но никако не се помалку вредни.

Јаболката се до врв полни со нутрициенси кои се насочени против различни болести, вируси, настинки, цената по килограм им е многу пријателски настроена кон домашниот буџет, а и не скапуваат така лесно. Нешто како македонска домаќинка, се претвора во медицинска сестра кога децата и се болни, штеди пари, но сепак дома носи врвен квалитет и никогаш не настинува.

Јаболката ви овозможуваат одлична хидратација. Со 84% вода во својата содржина не само што можат да ја залажат гладта, туку и ја задоволуваат жедта. Сепак имаат многу ниска калориска вредност од околу 80 калории во средно јаболко, без маснотии, без холестерол и без натриум.

Сите тие настинки и вируси што не демнееат деновиве со осцилациите на температурата, може да ве заобиколат ако си се држите до дневната доза од едно јаболко на ден. Ц витаминот кој што ќе го внесете преку јаболката е важен бустер на имуниот систем. Освен тоа во лушпата на јаболкото се наоѓа и еден силен антиоксиданс кверцетин, фитонутрициенс со антиинфламаторен и кардиопротективен ефект.

Кога сме веќе кај лушпата, ако сте си купиле од блиското пазарче, вкусни органски јаболка никако немојте да ги лупите. Освен кверцитинот, во лушпата се наоѓа и најголем дел од диеталните влакна, битен елемент за намалување на холестеролот, намалување на ризикот од развој на шеќерна болест и подобрување на работата на дигестивниот тракт.

Изберете јаболка која на површината нема никакви видливи знаци на удар или пад, а кога ќе ја помирисате треба да можете да ја почувствувате нејзината свежина и сладок или киселкаст мирис. Јаболката остануваат свежи во фрижидерот и до неколку недели, но чувајте ги во пластична кеса, подалеку од храна со јак мирис, бидејќи може да поприми мириси.

26 Септември 2013

За авторот