Фотографии и записи за Кабаш се среќаваат уште во издание на словенечкиот “Планински вестник” од 1939 година, а во далечната 1967 година група планинари го искачуваат врвот во првомајскиот период објавувајќи патепис во истото списание.

Денес е точно една година од ова наше искачување, но никогаш не е доцна за да се сподели приказната. Претходно повеќепати го имавме искачувано врвот и целиот гребен, но никогаш во вистински зимски услови.

За да се подготвиме не ни требаше многу, заминавме за с.Нистрово во среда попладне и движејќи се ноќе низ длабокиот снег пристигнавме на превојот Пралуга (околу 1700 мнв) каде го поставивме шаторот. Ноќта беше ведра и исклучително студена.

Наредното утро не дочека прекрасно изгрејсонце и убав ден во најава, се подготвивме за кусо време и појдовме најпрвин до врвот Рибничка Скала, а оттаму по целиот гребен до Кабаш. Вистинско алпско планинарење среде масивот Кораб, на кое поради спецификите на теренот треба да се биде крајно внимателен. А на Кабаш убавини, си честитавме со Благој и се освеживме пред да појдеме на долгиот пат за назад најпрвин до шаторот и потоа до с.Нистрово. Една од авантурите што не се заборава.

Видео:

Фотографии: