Пилатес му е мајката

Пилатесот е еден ефикасен тренинг кој допринесува за зајакнување и оформување на телото. За краток период има воочлив успех и е одличен за максимално опуштање и природно длабоко дишење кое е од голема важност за ова вежбање.

Со практикување на пилатес вежбите вие ги зајакнувате и тонирате вашите мускули без притоа да оформувате непотребна мускулна маса.

Ја подигнувате свеста за вашето тело, го подобрувате држењето на телото, го зајакнувате ‘рбетот и го правите пофлексибилен, ја подобрувате циркулацијата, ги олеснувате болките во грбот, ја подобрувате рамнотежата, добивате поголема контрола на дишењето, го намалувате стресот, а ја зголемувате енергијата. При тоа учите како да ги координирате телото, умот и духот.

Мало навраќање на пилатес историјата

Овој систем од вежби е создаден од Јозеф Пилатес, гимнастичар кој за време на Втората Светска Војна создал систем на вежби базирани на аеробикот кои ги предложил за подобрување на рехабилитацијата на ветераните. Јозеф Пилатес верувал дека менталното и физичкото здравје се тесно поврзани.

Тој препорачувал неколку прецизни движења нагласувајќи ја контролата и формата за да им помогне на ранетите војници да го повратат своето здравје со јакнење, истегнување и стабилизирање на одредени мускули.

Јозеф ги смислил „Пилатес Принципите” за доведување на целото тело во одлична форма: правилно држење, средиште, контрола, концентрација, прецизност, дишење и флуидност на движењето.

Оригиналниот репертоар на Пилатес содржи 34 вежби кои се изведуваат на подот врз простирка, но подоцна биле измислени и неколку направи, секоја од нив со свој репертоар на вежби. Поголемиот дел од вежбите кои се вршат на справите дизајнирани од Пилатес, се тренинг со отпор, кој користи пружини. Употребата на пружини дава постепен отпор, што значи со ширење на пружините отпорот се зголемува.

Јозеф Пилатес верувал дека со циркулацијата на крвта се будат сите клетки во телото и се отстрануваат отпадните материјали кои го предизвикуваат заморот. За крвта правилно да ја изврши оваа функција таа мора да биде исполнета со кислород и прочистена од отпадни гасови, а тоа се постигнува со помош на правилното дишење.

Според ова правило, ако го прекинете дишењето за време на вежбата, правите грешка во тренингот. Целосно и темелно вдишување и издишување е дел од секоја пилатес вежба. Тој сметал дека насилното издишување е клучно за целосното вдишување.

 „Стиснете ги вашите бели дробови како да цедите мокра крпа” наводно велел тој. Пилатес дишењето треба да се прави со концентрација, контрола и прецизност. Правилното и ефективно дишење, не само што ги оксигенира мускулите туку истовремено ја намалува напнатоста на вратот и рамената, тврдат оние кои вежбаат според овој метод.

Овој начин на дишење е опишан како задно странично дишење што значи дека на вежбачите им е наложено да дишат длабоко во задните и страничните делови на градниот кош. Кога издишуваат наложено им е да водат сметка на внатрешните стомачни и мускулите на дијафрагмата и да ја одржат нивната работа додека издишуваат. Пилатес се обидува правилно да ја координира оваа рутина на дишење со движењето, вклучувајќи инструкции за дишење со секоја вежба.

Како еден од помошните реквизити во пилатесот се користи големата пилатес топка. Додека вежбате со оваа топка вашата концентрација ја насочувате кон одржувањето на рамнотежа при што ги актвирате мускулите во средиштето на телото (body core). Тука се наоѓа голема група мускули, долниот дел од грбот, колковите и задникот.

Пилатес сметал дека мускулите од средиштето на телото се извор на енергија (powerhouse) која се насочува кон екстремитетите. Затоа овој тип на вежба бара интензивна концентрација. 

Во пилатесот секое движење има своја цел. Најважно е правилно да се изведуваат вежбите, затоа што пропуштањето на еден најмал потег има огромно влијание на комплетното вежбање.

Сите пилатес вежби се добро дефинирани, за да знаете каде точно треба да се наоѓа и како да е поставен секој дел од вашето тело. Движењата се со континуитет и треба да се изведуваат нежно и грациозно со што Вашето тело гради сила и издржливост.

Автор

Aleksandra Nikolovska

Скопје

Македонија