Кипчоге имаше маестрален настап во Берлин оваа година каде успеа да го подобри стартиот светски рекорд на Денис Кимето (поставен 2014 година на истата патека) од 2:02:57 за цели 1 минута и 18 секунди. Покрај фантастичниот резултат, со овие 78 секунди разлика, Кипчоге успеа да направи најголема разлика во подобрување на светскиот рекорд во последните 50 години. 

„Го имам најбрзиот маратон, но тоа не е најбрзиот маратон” – Изјави Кипчоге пред трката, мислејќи на нератификуваниот обид со Најк за рушење на бариерата „под 2 часа” каде беа користени различни методи за да се дојде до време од 2:00:23. 

Сепак, неговата форма во последниот период наговестуваше чудо на маратонската дистанца. Кипчоге истрча со неверојатна конзистентност во двете половини од маратонот, првата со време од 1:01:06, а втората со само 30тина секунди поспоро време. 

Воедно, во последни 2.195 км. Кипчоге истрча за 6 минути и 8 секунди што е најбрзиот финиш посведочен на еден маратон. 

„Отсекогаш рушењето на рекордот ми било амбиција, а овојпат се чувствував сигурен. Откако трчав на Монца, тоа ми покажа дека границите не постојат. Важно е да се тренира напорно, но и да се има верба во твојот тренинг метод, а доказот да го покажеш на трка.” – вели Кипчоге. 

Во последните неколку години Елиуд оствари некои фантастични достигнувања на полето на спортот, вклучително и Олимпиското злато во 2016 година, проектот „Под 2 часа” со Најк, и новиот светски рекорд сега во Берлин. Во 2020 година на негови 35 години, тој најави дека ќе се обиде да го одбрани олимпиското злато. 

Патеката на Берлин е позната како патека на која се рушеле најмногу маратонски рекорди досега.