Јанис Курос е грчки маратонец и ултрамаратонец. Роден е во Триполи (1956година), а моментално живее во Мелбурн, Австралија. Во тркачкиот свет е познат и како „Тркачкиот бог” и „Наследникот на Филипидес”. Неговите резултати во маратон (најдобро време 2:24) можеби не се ништо специјално во споредба со современите достигнувања, но ако зборуваме за ултрамаратонски трки подолги од маратон, Јанис Курос е рекордер со времиња кои тешко ќе се достигнат во годините што следат.

Тешкото детство и бавењето со атлетика од најмала возраст направиле од него спортист со цврст и нескршлив карактер. За грчката и светската спортска јавност Јанис Курос бил апсолутно непознат сè до Спартатлонот (трка од Атина до Спарта-246км) во 1983 година кога од потполн анонимус успева да победи и тоа со време кое и ден денес е недостижно 20 часа 29 минути и 04 секунди. Време што во просек значи 04мин и 59секунди по километар.

Истата таа година организаторот на трката одбивал да ја додели првата награда со образложение дека е физички невозможно трката да се истрча во такво темпо. За да биде уште поуверлив, наредната 1984 година Курос успева одново да победи со 4 минути побрзо време од она во 1983. Тоа време 20:25:00 е апсолутен рекорд на Спартатлон кој важи за најтешка трка во светот а на истата таа трка Курос има дури 4 победи.

Патот до тркачките легенди за Јанис Курос бил исцрпувачки и полн со скептицизам. Долги години бил под окото на јавноста заради чудниот начин на живот и невообичаениот начин на тренинг и изхрана. Курос целиот свој живот работел физичка работа и во просек спиел по само два до три часа. Како што тој самиот вели, кон крајот на 80тите години спиел само по час и половина за да успее да тренира и да заврши два факултети и една магистратура и сето тоа со бројни светски рекорди.

Курос вели дека никогаш не тренира повеќе од 16км на тренинг бидејќи според неговите сфаќања телото не е во состојба брзо да се опорави ако се надмине таа граница. На неделно ниво никогаш не истрчал повеќе од 130км и тоа во ретки случаи. Уште една работа која е „несвојствена” за него е што тој речиси целиот свој живот е веган.

Гледајќи го начинот на кој тренира и начинот на кој живее, лесно може да се заклучи дека тајната на неговите резултати е многу подлабока од тренинзи и исхрана. Курос вели дека за него секоја трка е уникатна можност да се биде најдобар и дека за време на ултрамаратонските трки тој се доживува како бог и е во состојба со умот да го натера своето тело да продолжи да трча. За време на трките мотивацијата често ја наоѓа слушајќи музика.

“Најголемиот дел од луѓето застануваат кога ќе се заморат. Јас не го правам тоа. Продолжувам да трчам кажувајќи му на телото дека не е уморно и дека може да продолжи.”

Јанис Курос во својата кариера има победено на повеќе од 70 ултрамаратонски трки и тоа со светски рекорди или рекорди на патеката. Покрај многуте победи на трките на 6 часа, 12 часа, 24часа и 48 часа, тој е легендарен победник на трката Сиднеј-Мелбурн. На оваа трка која се одржувала од 1983 до 1991 и била со должина од 875 километри Курос има победено дури пет пати. Неговото најдобро време, и се разбира рекорд на патеката, изнесува 5 дена 2 часа и 27 минути или во просек 175 километри дневно. Во најголемиот дел од случаите второпласираноиот учесник доцнел нешто повеќе од еден ден.

Во продолжение погледнете ја листата на светски рекорди кои сеуште никој ги нема надминато:

Тој е исто така сопственик и на светски рекорди на трки кои се трчаат на одредена дистанца:

Резултатите на Јанис Курос уште долго ќе сведочат за гоемината на човековите можности и ќе бидат предизвик, мотивација и сон за многу идни генерации на тркачи.