Наслов

Заролај, ослободи се!

Ако треба да се изберат „помагала“ која во последните 5-6 години го променија начинот, филозофијата и пристапот во тренажниот процес, многу од гласовите би отишле за пенастиот ролер (foam roller).

Едноставносвноста многупати е добитна комбинација. Следејќи го овој принцип ролерот се етаблира како незаменлива алатка на многу професионални тренери, клубови и спортисти кој ги бараат скриените патеките до успехот.

Неговата употреба е разноврсна и ефикасна во делот на превенцијата од повреди и максимизирање на ефектот на мускулите особено кога е во прашање нивната предтренажна подготовка. Стречингот и миофасцијалното ослободување е нешто што со ролерот го правите многу полесно и поефикасно иако постојат мислења дека миофасцијалното ослободување е многу покомплексен предизвик и неможе секогаш да се реши само со оваа алатка.

   

Лесното нанесувањето на притисок на засегнати „тврди" места на мускулите, односно тригер поинтс е одличен начин како да направите релаксација на овие затегнати места. Телото функционира како кинетички ланец и секоја точка која е затегната може да влијае во однос на друга, а со тоа и на целото тело.

Ако имате презатегнати адуктори поставете го телото врз ролерот во пределот на внатрешната страна од бутината, нанесете притисок со телото и ролајте, истото тоа можете да го сторите за било кој дел од телото, без разлика дали е тоа мускул на трупот или екстремитетите.

Бидејќи во најголем дел од случаите ролерот се употребува пред тренингот, незаборавајте да бидете доволно хидрирани затоа што дехидрираниот мускул ја нема таа еластичност и функција како добро „натопениот“ кој има поголема вискозност и е полесен за обработка. Како подготовка за тренинг, ролерот ќе има улога да го подготви мускулот за силни контракции и без тоа да правите некаков опсежен статичен стречинг кој и онака се повеќе се избегнува како подготвителна форма во одредени спортови.

   

Со притисокот што се нанесува врз мускулното ткиво се зголемува и циркулацијата која ги подготвува не само мускулите туку и врзивните ткива. Дозата за секој поединечен сегмент би требала да варира од 30-60 секунди за подготвителни и 2-3 минути за регенерациски сетови.

Ролерот најчесто предизвикува непријатна болка па затоа се греши кога ролањето се прави пребрзо се со цел да се избегне болката. Но целта е што поспоро да се третира засегнатиот дела особено онаму каде и најмногу се чуствува болката. Постојаноста и честата употреба како пред, така и после тренингот  ќе даде позитивни резултати во секој поглед.

Фото извор

12 Ноември 2013

За авторот