Наслов

Витамин Ц до максимум

Ако сте загрижени за количината на витаминот Ц и се прашувате дали вашата техника на подготовка на храна е исправна, повелете неколку диетални принципи за максимално зачувување на овој лабилен витамин.

Биолошката вредност на акорбинската киселина (витамин Ц) е поголема ако овошјето и зеленчукот се чуваат на ладно, суво и темно место бидејќи светлината е фактор кој е штетен и го разорува овој витамин.

Исто така осетлив е и на зголемена температура и присуствно на кислород во чие присуство брзо оксидира. Значи фрижидерот би бил одлично место за вашите богатства од витамин Ц, овошјето и зеленчукот.

Храната богата со витамин Ц не треба многу термички да се обработува, а при готвењето (варењето) воздржете се да не ѕиркате во садот, затоа што дополнително додавате кислород кој доведува до оксидација. Освен витаминот Ц, на оксидација се чувствителни и цитринот, витаминот А и комплексот Б.

Алкалната му штети, но киселата средина е полезна за овој витамин. Затоа киселата зелка е одличен извор на Ц витамин, а воедно и историски лек за скорбут (болест која се развива заради недостаток на Ц витамин).

Со термичката обработка уништувате и до 60% од количината на овој витамин, па затоа топло препорачуваме храната која изобилува со Ц витамин ја консумирате во сурова и свежа форма. И за крај, бидејќи заедно со Б комплексот се растворливи во вода, течноста не ја фрлајте, туку искористете ја за сос или прелив.

Извор: ВЕЛКОВСКИ Крсте, Основи на диететика и исхрана, Универзитет „Св. Климент Охридски“, Битола, 2002

08 Ноември 2013

За авторот