Како за почеток, најдобрата работа која можете да ја направите за себе пред да отидете на скијање е да бидете активни целата година пред тоа. Обидите да се вратите во форма неколку недели пред одморот не оди баш најлесно, па така полесно ќе ви биде доколку вашата спремност е веќе на ниво.

Како и да е, обрнување на внимание на специфична мускулатура во неделите кои претходат на оваа зимска активност е секогаш добредојдена. Потребни ви се неколку елементи. Силен и издржлив задник, подобрување на аеробниот капацитет и додатно активирање на мускулите на трупот.

1. Зајакнете ја задната ложа

Постои многу добра причина зошто скијачите имаат толку добро затегнати и дефинирани задници. Мускулите како глутеусите и целата задна ложа се тие што ве држат стабилни за време на скијањето. Затоа, немојте да се колебате да се ставите „под тегови“. Инкорпорирајте чучњеви, исчекори и мртви подигања со кои одлично ќе ја активирате целокупната ножна мускулатура.

2. Зголемете го аеробниот капацитет 

За скијање се потребни и издржливост и снага (повредите најчесто настануваат при умор). За да ги изградите и двете ставки, високо интензивните интервални тренинзи се одличен старт. Комбинирајте ги долгите трчања со кратки но брзи спринтови со што ќе го држите пулсот повисоко и правете силови вежби со специфични движења.

3. Обрнете внимание на мускулатурата на целиот труп

Балансот е битен дел од скијањето, а најмногу зависи од мускулите на трупот. Активирајте ја целата мускулатура, од предните и страничните стомачни со специфични вежби, внесете руско ѕвоно во игра и не заборавајте на изометричните вежби.