Честа грешка и превид, најчесто од незнаење и несоветување со професионален тренер, која се прави при вежбањето во теретана е тоа што една тренинг сесија на повеќето од луѓето е стриктно и остро определена на само една мускулна група без никакво инкорпорирање на целото тело во заеднички кинетички ланец (она што тоа вистински претставува). 

Посветеното тренирање и внимавањето на исхраната и животниот стил без сомнение ќе ви донесе добро дефинирани мускулни групи, но се додека не ги споите сите делчиња на ланецот да функционираат во една моќна целина и тоа во сите три рамнини, вие секогаш ќе имате некоја слаба точка која ќе ве направи послаб атлет особено ако се движите во професионалните води.

Кога во прашање се ставени слабите телесни точки односно слабо активираните и затегнати мускулни групи на пошироката активна и фит популација тука мора да ги споменеме глутеусите (мускулите на задникот) и трансверзалните абдоминални мускули (дел од мускулатурата на торзото).

Глутеусите иако се најмоќните мускули во човечкото тело, тие се често слаби поради несоодветната форма на тренирање. Како едни од задолжителните вежби за оваа мускулна група кои најверојатно имате потреба да ги правите ги наведуваме:

• Длабок чучањ

• Hip Thruster

• Пистол чучањ – Pistol Squat 

Особено внимание обрнете на овие првите две кои доколку не сте имале можност да ги вежбате, не пробувајте да го правите тоа било каква тежина туку усовршете ја формата без или со минимален товар (препорачуваме вежбање под контрола на професионално лице).

Мускулите на торзото (core) се исто така многу често запоставена група која се вежба, а просто кажано таа е конекцијата меѓу горната и долната половина од телото, така што не претставува баш мал дел од ланецот. Сепак, трансверзалните абдоминални мускули како и другите мускули кои ја сочинуваат оваа група е убаво да ги активирате преку овие вежби:

• Штица (plank) 
   
• Згибови на вратило 
   
• Бицепс со права шипка

За изометријата во штицата и нејзиниот длабок ефект ќе си прочитате тука, а ако се прашувате зошто баш згиб и вежба за бицепс се наоѓаат во листата, ќе ви кажеме дека пасивното активирање на торзото при овие вежби е исто толку добро колку и активното во штицата. 

Важно е само свесно да ги активирате овие мускули како би ја стабилизирале вашата позиција при изведбата, а тоа ќе ви донесе голем бакшиш од овие вежби кои се доминантно за други мускулни групи.