Бујрум, четири совети кои имаат потенцијал да ве направат поиздржливи.

Најпрво, иако советите кои се наведени подолу изгледаат неверојатно едноставни и прости за првично инкорпорирање во вашето секојдневие, нивниот вистински резултат ќе се покаже само ако доволно долго и правилно ги практикувате. Затоа, променете нешто во вашето секојдневие, започнете да ги практикувате постојано и станете поиздржливи во било која спортска дисциплина и област.

1. Дишење на нос

Дишењето на нос, можеби има најголем и најдлабок импакт врз општата благосостојба од сите овие техники. За јогините, бенефициите од назалното дишење биле познати многу одамна и сето ова го претвориле во посебна наука наречена пранајама (Prāṇāyām).

Бебињата дишат на нос секојдневно. Тоа им е генетски детерминирано и го прават без разлика дали јадат, спијат, си играат или плачат, се разбира се додека не им е затнат носот. Но, како што старееме сите ние почнуваме да ја заменуваме оваа природна техника со „голтањето” на воздух преку уста.

Зошто е толку битно дишењето на нос? Прво и основно, организмот го создал носот за дишење и мирисање (кај кого, како). Кога воздухот поминува низ носните ходници тој не само што се загрева и филтрира, туку полесно стигнува до подолните партии на белите дробови каде што бројот на капилари е поголем, а со тоа и размената на гасови е поголема. За разлика од ова, дишењето на уста не го активира целосниот капацитет на белите дробови и имаме недоволна искористеност на вдишаниот воздух. Повеќе кислород значи поздрав организам кој е способен за подолготрајна аеробна вежба.

Дишењето на нос исто така има смирувачки ефект врз нервниот систем и срцето со што ви овозможува да вежбате со истиот интензитет, но со многу помал пулс.

2. Намалете ги стимулансите

Една мала компарација! Доколку земете кредит од банка, после одреден период вие сте обврзани да ја вратите сумата на пари, но со камата. Што се случува кога ќе позајмите енергија за вашето тело преку пиење на кафе и енергетски пијалоци? Исто така ќе треба да ја вратите таа енергија и тоа исто така ќе биде со камата.

Никој не вика дека треба да се откажете од овие задоволства, но доколку целосно се потпрете на нив за енергија кога – тогаш ќе морате да си платите. Најчесто, преку денот овие стимуланси служат за „бустање” на вашата енергија, но доколку претерате на крајот од денот вие се чувствувате изнемоштени.

Вистинската сила доаѓа од вашата внатрешност, а не од кафињата што сте ги испиле. Пробајте малку од малку да намалите со овие напивки и дефинитивно ќе ја осетите разликата. Вашиот организам ќе се детоксифицира, а вие ќе можете мирно да заспиете.

3. Применувајте пониска јагленохидратна диета

Забележете дека во поднасловот никаде не пишува „диета без јагленохидрати”. Тоа би било глупаво, особено за некој што вежба, бидејќи шеќерите се тие кои се првата енергетска линија на организмот.

Под „пониска” ј.х. диета се мисли на исхрана која е составена од многу полно зрнести житарки, свежо овошје и зеленчук. Или понаучно кажано јаглехидрати кои имаат низок GI (гликемичен индекс). Исфрлете ги простите и рафинирани шеќери како бел ориз, бел леб, бел шеќер, паста и газирани сокови.

Со ова вие ќе ги избегнете огромните качувања (до плафон) и падови на шеќерот во крвта, а тоа е клучно доколку сакате да имате стабилен извор на енергија. Додека тренирате, и самите ќе забележите дека константните нивоа на шеќери во крвта ќе ве послужат многу подобро од кратките, но огромни количини на јаглехидрати. Вие ќе станете постабилни и поиздржливи, а вашата рекуперација ќе биде подобра.

4. Не брзајте никаде!

Сите ние некаде брзаме. Од работа, брзо на ручек, па на тренинг и што побрзо да се испотиме па да се бапнеме во кревет после топлиот туш. Брзиот тренинг е добар само ако специфично се прави за некоја намена. Инаку сето друго брзање не е воопшто добро бидејќи имаме поголема можност да се истрошиме пред да го постигнеме нашиот целосен потенцијал.

Секој организам е изграден на различен начин, но секогаш е добро да се воздржиме и да тренираме со помал интензитет, но во подолг временски период. За било кој спорт ова може да дојде како одличен совет. Пробајте да трчате поспоро, но истрчајте повеќе! И гледајте да го држите пулсот на што е можно пониско ниво (ако го мерите), а доколку сакате малку повеќе да се смирите пробајте да го внесете првиот совет, дишете на нос.

Ова важи и за дигање тегови. Следниот пат, пробајте да ги правите сериите со помала тежина, но зголемете го бројот на повторувања. Дефинитивно добро ќе ви дојде.