Живееме во време кога фитнес индустријата ги обликува нашите ставови за тоа што сè е потребно за добар тренинг. Точно е дека поседувањето на фитнес реквизити ќе го олеснат тренингот но исто така е точно и тоа дека добриот тренинг не е неопходно врзан за било какви справи. Ви претставуваме тренинг за нозе кој е практикуван во тренажниот процес кај многу спортови, а за кој се што ќе ви биде потребно е едно обично столче.

Седнувањето и станувањето од столче со една нога е една од најдобрите и за жал комплетно запоставени и заборавени вежби. Едноставна е и супер пристапна, можете да ја изведувате буквално на секаде, а резултатот секако ќе дојде.
Оргинално оваа вежба била замислена да се изведува на бенч клупа но во суштина нема апсолутно никаква разлика на кој предмет ќе се изведува. Особена примена има кај спортовите кај кои експлозивноста е важна како фудбал или пак рагби.

Оваа мошне функционална вежба има изолациска улога пред сè за квадрицепсите и глутеусите, но исто така е една од најдобрите сатбилизациски вежби за колковите. Редовната примена ќе ја зголеми вашата експлозивност, агилност, издржливост, баланс и ќе создаде цврста основа за подобрување на чучањот со тежини.

Како се изведува:

Најпрво одберете столче кое најмногу ви одговара. Под одговара се мисли пред сè на висината на столчето. Колку е тоа повисоко толку вежбата ќе биде полесна. Поставете ги нозете во проекција на рамената. Едната нога подигнете ја нанапред. Почнете полека да се спуштате притоа држејќи го грбот комплетно прав а градите исфрлени нанапред. Откако ќе седнете на столчето, почекајте една до две секунди и почнето со станувањето. Станувањето треба да биде иницирано од колковите и да се подига од петите.

Ногата која е подигната, треба да остане во воздух за целото траење на вежбата односно таа не треба да ја допре подлогата. Изведете 8-12 повторувања на секоја нога и повторете ја вежбата во максимални 3 серии.

Оваа вежба е една од најдборите вежби која ќе ви помогне да стигнете до првото изведување на таканаречениот Pistol squat.