Основи на Триатлон Транзиција - Прв Дел

Наслов

Како до лесна и беспрекорна Триатлон транзиција

Луѓето што се натпреваруваат или пак што никогаш не се натпреварувале во триатлон, најчесто ме прашуваат кој сегмент е најтежок, најважен и најмногу треба да се тренира. 

Дали пливањето затоа што е прво по редослед и тука се формираат помали и поголеми групи кои што подоцна ќе продолжат на велосипед?

Дали возењето велосипед затоа што е временски најдолго во споредба со пливањето и трчањето?

Или пак трчањето затоа што доаѓа последно, каде што сите се релативно изморени и теоретски „најправедно" ќе се види на кого колку му се способностите?

Мојот одговор е транзицијата во триатлонот!

Тоа е сегментот што е најтежок и најмногу треба да му се посвети внимание. Зошто? – Затоа што не е фер спрема себе си да посветите месеци и месеци тренинг и мака за да подобрите 5 сек./100м во пливањето, а истото време да го загубите затоа што немате доволно искуство во зоната за транзиција барајќи си го велосипедот или патиките.

Секако, општо земено кај почетниците во спортот, важни се издржливоста и самиот натпревар е огромно искуство, но на некое средно, напредно или професионално ниво на натпреварување, каде што трката е „тесна" и непредвидлива се добиваат и губат секунди, решавачки за победата.

Пред да Ви објаснам како да заштедите време во зоната за транзиција, морам да напоменам дека транзицијата не е пауза, одмор или нешто слично. Тоа е драгоцено време кое што вие го немате!

Сега е одлично време за вежбање на вашата транзиција од пливање на велосипед, позната како Т1, и од велосипед на трчање – позната како, најверојатно претпоставивте, Т2.

Вежбајте ја Т1 транзицијата на плажа или базен.

„Направете" си своја Т1 зона, оставете ги сите потребни работи на велосипед или на пешкир. Кацигата одврзана и наочарите на велосипедот, „спринтерките" (доколку имате) за возење прикачени на педалите и спремни сте да почнете!

Започнете со лесно пливање (100-300м) и обидете се да симулирате излез од вода како на натпреварот. Доколку сте на базен, веднаш по излегување од водата истрчајте 50м надвор од базенот. Додека трчате извадете ги наочарите и капата за пливање и оставете ги на пешкирот (или во корпата на натпреварот. Ако не е оставена опремата на соодветното место, добивате казна од 30 секунди!).

Вториот дел од Т1 е ставање на опремата за велосипед.

По долго пливање, најчесто сме дезориентирани и самата промена од хоризонтална во вертикална положба на телото претставува шок за организмот. На тренинг вежбајте го вадењето и ставањето на кацигата и наочарите, неколку пати споено.

Ова ќе ви помогне да го научите движењето на изведување. Верувајте дека по 1500м пливање рацете нема воопшто да ви бидат „свежи" или пак координирани. Внимавајте кога сте во зоната за транзиција, бидејќи покрај вас ќе има уште многу други натпреварувачи на многу мал простор.

Т2 транзицијата е некогаш и поважна од финалниот спринт. Вежбајте го облекувањето на патиките, и вадењето на кацигата. Покрај ова, клучниот момент е и спуштањето од велосипедот. Бидете сконцентрирани, внимавајте на спортистите околу вас и размислувајте за секое ваше движење!

На денот на натпреварот сите овие работи ќе треба да ги примените. Кога ќе стигнете на „check-in", разгледајте ја патеката и визуелизирајте си каде ќе се движите и запомнете каде ви е поставен велосипедот и опремата. Ориентирајте се според некој објект во близина. Ви посакувам лесна трка и глатка транзиција!

Се ближи државното првенство во Маврово, па се надевам дека овие совети ќе ви дојдат при рака ;)

03 Јули 2013

За авторот