Мускулните болки после тренинг или после било каков напор на една или повеќе  мускулни групи популарно наречена muskulfiber е нормален процес на мускулна регенерација и раст. Овој процес трае 48 до 72 часа и се карактеризира со мускулна затегнатост, крутост па дури и слабост.

Познавањето на овој природен процес секако дека ќе направи психолошки ефект во надминувањето на овој „сладок проблем”. Секоја поинтензивна мускулна активност доведува до микротрауми или оштетувања на мускулните влакна. Таа состојба во организмот стимулира низа на биохемиски и имунолошки реакции со лачење на хормони.

Зголемениот проток на крв во овие мускулни регии прави огромен дотур на материи потребни за регенерација и изградба на нови мускулни влакна. Најголема улога прво имаат клетките чистачи – макрофаги кои ја почнуваат оваа акција. Пореметената рамнотежа на калциумовите јони, присуството на цитокините и зголеменета концентрација на слободните радикали само ја надополнуваат провокацијата за мускулна регенерација т.е. нов раст.

Уште Хипократ рекол дека болката е најголем пријател на човекот па затоа кон пријателот однесувајте се пријателски. Ако лесно ја вклучиме логиката ќе заклучиме дека претерана употребата на било какви аналгетици, NSAID (нестероидни анти-инфламаторни лекови)  не се добредојдени кај оваа природна реакција.

Секако дека поголемите мускулни трауми, руптури се сосема нешто друго и таквите дефекти не се регенерираат со нови мускулни влакна туку со сврзно ткиво.Тоа е сосема друга проблематика која има сосема друг правец на третман и мускулна рехабилитација.

Како да ги намалиме овие слатки болки ?
За болни мускули после интензивен тренинг најповолен лек е секако пласирањето на ладни облоги. Комбинацијата со истегање на мускули или мускулни групи (streching) е најдобриот природен лек. Добро истегање, дали статичко во траење од 30 до 40 секунди или неизменично со фази на опуштање е најповолна физикална метода која треба да биде дел од вашата тренинг агенда.

Секако, добра превентива и припрема на организмот е консумирање на одредени типови на храна кои ги намалуваат воспалителните реакции без да наштетат на нормалните регенерирачки реакции.

Ананасот со ензимот бромелин го намалува отокот и болката. Биофлавоноидите од јаболките и црешите се благопријатни врз микротраумите на мускулите, а ѓумбирот пак делува врз намалување на простагландините кои се носители на воспалителните реакции. Исхрана богата со магнезиум, омега масни киселини и цинк се сосема доволни како добра поддршка на овие процеси.

За крај, немојте да бидете меки и нежни типови и типки. Уживајте во своите вежби и научете да уживате со вашиот голем пријател – Muskulfiber.