Една од најчестите грешки кои се прават во областа на трчањето на поголеми дистанци е недоволното внимание кое се оддава на процесите на опоравување и заздравување на организмот во неделите по трката. 

Иако можеби ви звучи логично после вакви трки да направите неколкудневна пауза и повторно да влезете во тренинг шема за да не го изгубите вашето фитнес ниво, неодвојувањето на доволно време за рекуперација е најгрешната работа што можете да ја направите која може да донесе сериозни повреди.

Телото трпи сериозни оштетувања за време на полумаратонската трка, а да не зборуваме за маратонот или можеби нешто повеќе со претставка „ултра“. Мускулите, тетивите, лигаментите и скоро секој физиолошки систем и клетка од телото е ставен пред сериозен предизвик кога трчаме волку долги дистанци. 

Времето поминато во опоравување (колку и долго да ви звучи) дефинитивно нема да ви ја намали вашата кондиција. Истражувањата покажуваат дека намалувањето на VO2 максималниот капацитет кај добро и редовно тренираните личности е на минимално ниво и тоа многу лесно може да се надополни после коректниот опоравок на организмот.

Впрочем и најврвните светски атлетичари кои живеат од овие трки ги следат овие долги шеми на заздравување токму затоа што така си го штедат телото, а тоа ги прави подобри за следните трки. 

Кога во прашање е истрчан маратон, широко применувани методи на опоравување се следните. Првата недела после маратонот се зема максимален одмор со пиење на доста течности, масажа, јадење на доста квалитетна храна (повторно со акцент на здрави јагленохидрати како би си ги повратил гликогенските резерви), лесен стречинг и многу нежни и кратки џогинзи или евентуално крос-тренинзи како пливање при крајот на неделата. 

 Би можело да ве интересира: КАКО ДА ГО ЗАБРЗАТЕ ОПОРАВОКОТ НА МУСКУЛИТЕ

Дополнително на ова, наредените две недели исто така треба да бидат исполнети со лесни пост-маратонски тренинзи пред повторно да се вратите на посериозни дистанци. Иако ова можеби ви делува многу и ќе почнете да мислите дека се запоставувате, тоа на долги стази ќе ве направи многу подобри пред следниот предизвик. 

За полумаратонците оптималната рекуперација би била околу две недели со истите овие препораки. Првите неколку дена по трката сериозен одмор, хидрирање, масажа и добра храна за потоа да се почне со лесни тренинзи и со зголемување на интензитетот.