Иако сте се одржувале во добра форма низ текот на годината и се чувствувате во солидна кондиција, фитнес експертите сепак препорачуваат да потрошите некое време во вежбалните или пак дома, со акцент на силови тренинзи пред впуштањето во ски сезоната. 

Внимание – за сите оние кои не се пронајдоа во првиот пасус, ова е задолжително, а дополнително прочитајте ја и оваа статија – НЕ ИДЕ, ОД ФОТЕЉА НА СКИИ! – затоа што реално, не иде…

Значи, најважниот аспект за превенирање на било какви повреди при зимските спортови, кои верувајте дека се многу чести, е зајакнувањето на силата и стабилноста во нозете и трупот, а за да можете без поголеми проблеми да истуркате еден скијачки ден, тука е важна и вашата кондициска подготовка. Затоа, статијава ја таргетираме токму на овие три есенцијални фитнес елементи за безбедно скијање. 

СИЛА И СТАБИЛНОСТ

Без разлика дали сте скијач или сноубордер, една од најважните елементи во скијањето се несомнено долните екстремитети. Затоа ставете фокус на силата во нозете, и тоа одете со наједноставните вежби како чучнувања (главно за предна ложа и задник), мртви подигања (за задна ложа) и исчекори. 

Вклучете ги овие вежби без разлика дали можете да појачате на тежината или не. Понекогаш доволно е и само да бидете во можност да ги правите овие вежби во неколку серии по повеќе повторувања со сопствената тежина, а тие ќе ги зајакнат мускулните елементи, главната врска во заштитата на вашите лигаменти и зглобови.

Стабилноста во текот на овие активности е исто така од огромна важност, а таа во најголема мера произлегува од подготвеноста на мускулите на трупот и нозете па затоа овие вежби се неизбежни (читај повеќе – ЗАДОЛЖИТЕЛНО, ТРУПОТ! (BODY CORE). Пробајте варијации на изометрични вежби со одредени движења, користење на баланс дискови, пилатес топка и осетете како се активира го трупот. 

Плиометриските типови на тренинзи се истотака добредојдени за подобрување на снагата и експлозивноста. 

КОНДИЦИСКА ПОДГОТОВКА

Во текот на предсезоната, професионалните скијачи отприлика три дена во неделата тренираат сила, експлозивност и стабилност. Останатите два тренинг денови им се оставени за кардио, како аеробна така и анаеробна припрема. 

И двете се важни кај професионалците, но и двете се подеднакво добри и за рекреативците. 

Добра аеробна подготвеност ќе ви овозможи побрз опоравок во текот на скијањето, а анаеробните вежби ќе ве направат поиздржлив на оние стрмни и тешки стази каде пулсот оди близу горните граници. Тренирајте ја вашата аеробна подготвеност преку трчање или возење велосипед, но вклучете и некои високоинтензивни тренинзи кои ќе ве подготват и анаеробно. 

Уживајте во скијањето или бордањето…