Наслов

Избери ги скалите, а не ескалаторот

Она што веројатно не сте го знаеле е дека во меѓувреме качувањето скали стана спорт кој е во постојан раст и со се поголем број на организирани трки, а ако сте се прашувале зошто качувањето скали е составен дел од тренингот на многу спортисти аматери и професионалци, еве го одговорот.


Качувањето скали е еден од најефективните начини за согорување на калории што пак е клучно во успешното одржување или губење на телесната тежина. Пример, за еден час качување човек од 70кг би потрошил околу 530 калории. Луѓето кои го практикуваат сето ова како спорт трошат двојно повеќе калории од луѓето кои се бават со тимски спортови како кошарка или одбојка. Сепак она што исто така треба да се знае е дека вкупната потрошувачка на калории зависи од висината, тежината, староста и интензитетот на тренингот.

Кардиоваскуларниот фитнес е еден од првите сегменти на коj за краток временски период можат да се почуствуваат бенефитите од качувањето скали. Според истражувањето на Journal of Preventive Medicine од 2000година, качувањето скали кај луѓето со седентарен стил на живеење на краток временски период носи големи придобивки за целокупното срцево здравје. Во период од само неколку недели нивното вкупно фитнес ниво било зголемено за речиси 40%.

Овој тип на тренинг е идеален од повеќе причини. Економичен е, не е потребна никаква дополнителна опрема а сепак за истиот е потребен значително поголем напор од пешачењето или трчањето на рамен терен. Качувањето ќе ви помогне да развиете или да ја унапредите силата во долниот дел на телото. Со оваа вежба ги зајакнувате: квадрицепсите, глутеусите, мускулите на задната ложа, листовите, меките ткива и зглобовите на нозете, како и јадрените мускули.

Доколку дополнително сакате да ја усложните оваа и онака напорна вежба, пробајте што помалку да замавнувате со рацете или не ги користете воопшто. Ако и тоа не ви е доволно тогаш користете тегови на зглобовите на нозете. При симнувањето одете. Иако ова е можност за одмор, сепак со одењето надолу позитивно влијаете врз тонусот на мускулите кои не се употребуваат при качувањето.

Од причини што качувањето скали сериозно ги предизвикува вашиот аеробен и анаеробен сите, ова може да биде одличен крос тренинг за сите спортови на издржливост: трчање, пливање, велосипедизам, треил трчање. Со гаранција ќе влијае врз нивната издржливост или спринтерски перформанси, а од друга страна ќе биде освежување и промена од секојдневната рутина и монотнија.

Доколку пак качувањето го користите како примарна кардио вежба, не заборавајте дека ова е тренинг кој не го активира горниот дел на телото. Со други зборови доколку сакате во исто време да работите и на сила во горниот дел од телото, помеѓу сериите на скали вметнете и по некој склек или трицепс пропаѓање. Дополнително збогатете го вашиот тренинг и со вежби за стомак.

26 Октомври 2016

За авторот