Исхраната игра огромна улога во тренажниот процес без разлика дали сте рекреативец или професионалец. Правилното подмачкување на вашата машина во комбинација со планирани тренинзи е патот кој загарантирано води до успех. Иако појадокот е најважниот оброк во текот на денот, ако уживате во утринското трчање, најверојатно тешко го вклопуватe, а уште потешко времето потребно за варење на храната (барем 2 часа), во распоредот. Сепак повремено може да си дозволите утрински да стапнете на стаза без оброк, но професионалците препорачуваат тоа да не се практикува повеќе од еднаш неделно.

Што се случува ако не појадувате и дали треба да се трча без појадок?

По преспаната ноќ, организмот е одморен, но и резервите на шеќер се намалени речиси на дупло (од просечните 60 на 30 грами), бидејќи поминало многу време од последниот оброк. Додека мускулниот гликоген го искористуваат ексклузивно мускулните клетки, гликогенот од црниот дроб е наменет за нервните клетки. Во услови на намалени депоа на гликоген, при физичка активност, доаѓа до активирање на липолизата, процес при кој се добива енергија од масното ткиво.

Кога планирате да трчате без појадок, најдобро е да обратите внимание на вечерата. Истата не треба да биде преобилна, но треба да биде составена од сложени јаглехидрати, малку протеини и маснотии и секако да изобилува со витамини и минерали, со цел да се одржи нивото на гликоген во организмот. Интегрална паста, интегрален леб или интегрален ориз, со малку месо или риба и салата е добар избор.

Тренингот без појадок може да се практикува еднаш во неделата, но никако не смее да трае повеќе од 60 минути. Од друга страна исто така, тој треба да биде со намален капацитет (50-60% од максималниот пулс) кога организмот го штеди расположливиот гликоген за сметка на масното ткиво. Ако го засилите интензитетот, ќе дојде до брза потрошувачка на гликогенот, а симптомите вклучуваат вртоглавица, малаксаност и замор, феномен познат како „удирање во ѕид“.

Доколку тренингот трае повеќе од 60 минути, задолжително земете дополнителен шеќер. Во спротивно доаѓа до разградување на протеини до аминокиселини и слабо расположлив гликоген, натрупување на отпадни материи и одложување на регенерацијата и ризик од повреди.

Секако, утринскиот тренинг без претходен појадок, задолжително како и секој друг тренинг треба да биде придружен со соодветна хидратација. Напијте се вода веднаш по разбудувањето, пред да започнете со тренингот и за време на трчањето за оптимална хидратација и исфрлање на токсините.

Напомена: Високо интензивните тренинзи, долгите тренинзи повеќе од 1 час, тренинг на лактатниот праг и сл. не е препорачливо да се обавуваат без претходен оброк.