Занемарувањето на пост тренажниот период и несоодветната рекуперација го зголемуваат ризикот од повреди, а да не зборуваме за тоа дека дел од потта и енергијата што макотрпно ја вложувате паѓа во вода. Истегнувањето е задолжително, а следува листа од намирници кои ги сакате на трпезата за полесно да ја пребродите слатката болка…

1 КУРКУМА

Жолтиот зачин ќе го најдете речиси во секоја продавница, а во последно време продавниците за здрава храна почнаа да нудат и свежи ризоми (корен од куркума) кој слободно може да го додадете во соковникот или блендерот како дел од протеинскиот шејк. Ефектот на куркумата е сличен со оној на анти-инфламаторните лекови како што е ибупрофенот т.е. го намалува воспалението во мускулите и зглобовите и ја намалува болката. 

2 ЃУМБИР

Од иста фамилија како и куркумата, ѓумбирот покажува антивоспалителен ефект и го спречува дејството на непосакуваните инфламаторни ензими. Според некои истражувања, ѓумбирот може да ја намали болката и згрченоста во мукулите за 25% доколку се консумира во пост тренажниот период. Попарете парче ѓумбир со врела вода за чај или изрендајте малку од коренот во оброкот за доза пикантност и бенефиција.

3 ЦРЕШИ

Сокот од цреши, особено од темните сорти е рангиран како еден од најбогатите извори на антоцијанин, познат по своето антиоксидансно својство, но исто така го намалува и воспалението. Сокот од цреши го намалува оксидативниот стрес кој се јавува при засилена физичка активност.

4 МАСНА РИБА

Лосос, сардини, харинга, туна и другите масни морски жители се одлично залче за надополнување на протеини, но и омега 3 масни киселини, по напорен тренинг. Омега 3 масните киселини го засилуваат крвотокот и размената на материи, па телото полесно се опоравува од натрупаните метаболити, а да не го спомнуваме и фактот дека масната риба ги чува срцето и мозокот. Експертите препорачуваат барем еден оброк од масна риба во неделата или дневно надополнување од 1000-2000 мг омега преку суплементи.

5 КАФЕ

Како стимуланс логично е кафето да се најде на менито пред тренинг, но една студија покажала дека кофеинската суплементација ја намалува болката во мускулите за време и после вежбање, па затоа омилениот утрински пијалок го споделуваме и во оваа листа. Заклучокот е слободно пијте кафе пред вежбање за помалку болка после тоа.