Наслов

„Измамата“ со бурекот

Многу тешко па дури и неверојатно ќе биде да се промени терминот „бурек со сирење“ кој е длабоко врежан во нашите социјални и изгладнети пори иако сите добро знаеме дека сиот наш македонски бурек е всушност со урда. Не берете гајле, нашите пекари се грижат за нас, урдата е поздрава од сирењето!

Одличен извор на протеини
За било кој од нас, независно дали билдер, хокеар, дете или баба, урдата може да претставува драгоцен извор на уште подрагоцените протеини. 100 грама урда содржи околу 15 грама протеин, а тоа е околу 1/3 од препорачаната дневна вредност за просечен човек. Малку урда за појадок, малку за вечера и можеби најважниот градежен елемент во вашето тело ќе биде задоволен.

Каде-каде помалку масти од сирењето
Во самиот процес на произведување на урдата се намалува количината на мастите споредбено со сирењето. Таа најчесто доаѓа со 10% масленост, за разлика од многу потешките сирења и кашкавали кои содржат по 30 па дури и 50% масти. На пазарот може да најдете и ниско маслена урда уште повеќе ќе го скрати вашиот внес на масти, но не заборавајте дека и мастите се здрави и потребни!

Симни некое кило со урда
Бидејќи симнувањето на тежината на крајот на краиштата се сведува на колку калории си внел, а колку си потрошил, урдата (особено нискомаслените варијанти) како дел од ниско маслена и ниско јаглехидратна диета може да помогне. Умереното јадење на урда како замена за повисоко калоричните фета и биени сирења комбинирано со одличен тренинг распоред сериозно може да ве однесе на понасмеаното дупче од каишот! ОВА НЕ ВАЖИ АКО УРДАТА Е ДЕЛ ОД НЕКОЈА ОСМИНА ИЛИ ЧЕТВРТИНА.

Копај минерали
За да бидете „коска“ со здравјето, внесувајте доволно минерали. Урдата е богата со калциум и фосфор кои се битни за здравјето на коските, особено кај постари и постклимактерични жени кои често имаат проблем со остеопорозата.

Не пиј B-комплекс, јади урда!
Како и сите млечни производи и урдата изобилува со B витамини. 200 грама урда содржи 1,4mcg (микрограми) на B12, исклучително важен витамин за нашите понекогаш слаби сплетови на нерви, како и за нормално формирање на црвените крвни зрнца. Ова особено важи за оние крајно достојни вегетаријанци кои слабо го примаат овој многу важен микронитрициенс. Урдата исто така содржи количини на B1, B2, B6, пантотенска киселина и фолати.

Пази на солта
Бидејќи солта се поврзува со редица потенцијали кои се стремат да ве наместат во чекалната на докторот, разумното внесување и контолирањето на нејзиниот внес е многу важно. Урдата, доколку ја внесувате во поголеми количини во вашата исхрана може да содржи доста сол. Најубаво е да си одберете несолена урда (се наоѓа во маркетите или од кај бачот) па сами да си ја насолите со многу памет, а малку сол.

03 Декември 2012

За авторот