Во зависност од температурата и сезоната при планинските искачувања, обувките се делат на: три сезонски и зимски.

Три сезонски се обувките кои се наменети за планинарење во услови на потопло време, пролет, лето и есен, но можат да се користат и во зима на пониски планини каде температурата не се симнува далеку под нулата и каде што планинарската тура е пократка.

Зимските обувки за разлика од предходните се наменети за зимно време, или за летно искачување на највисоките врвови, каде температурата оди доста под нулата, така што можеме да ги класифицираме во “All Season” обувки за високогорско искачување. Тие имаат висока термичка изолација, која ги штити стапалата од измрзнување.

Градбата на планинарските обувки се состои од повеќе делови, како што е ѓон (Sole), меѓуѓон (midsole), влошка (insole), постава (lining), надворешен слој (Upper), врвки и јазик. Во главно постојат 5 типови на планинарски обувки:

• Trail Running
• Аpproach
• Hiking
• Trekking
• Mountaineering

Trail Running обувките се наменети за планинско трчање, но може да се користат и за лесно планинарење на порамни патеки. Тие се ниски, флексибилни, но со доволно агресивни шари на ѓонот, кои спречуваат пролизгување.

Approach обувките се хибрид помеѓу hiking патики и алпинистички обувки. Тие се дизајнирани за прецизно газење по каменести терени, а се наменети за пристап до теренот каде се изведува алпинизам. Карактеристично кај овие обувки е алпинистичкиот дизајн на врвките кои одат скоро до врвот на обувките, а со тоа овозможуваат подобра контрола и прецизност.

Hiking обувките можат да бидат ниски (патики) и средно високи или високи обувки. Hiking патиките се поиздржливи од Trail Running патиките, и при изборот на обувки се наоѓаат помеѓу Trail Running патики и Hiking обувки. Претежно користат Vibram ѓон и меѓуѓон кој е поцврст за разлика од патиките кои се наменети за планинско трчање. Се користат за еднодневни тури каде планинарот не носи поголема тежина. Предноста на патиките за планинарење е нивната флексибилност и прецизноста во газењето, а нивната маaна е потпората при свиткувањето на зглобот.

Доколку сакаме да одиме на планинарска тура каде ќе носиме поголем товар, тогаш правилниот избор се Hiking обувките, кои се дизајнирани да овозможат добра потпора на зглобот и комфор. Тие се повеќе издржливи на каменести терени, а нивниот цврст ѓон ќе ги амортизира ударите од острите камења на патеката. Наменети се за планинарски тури по нерамни терени, каде е потребна поголема потпора на зглобот и каде планинарот носи товар со средна тежина.

Trekking обувките се наменети за оние планинарски тури кои се повеќедневни, каде планинарот носи голем товар и каде е потребна голема потпора на зглобот. Овие обувки се наменети за секаков вид на терен и за секакви временски услови. Често на овие обувки се наоѓаат и држачи за обични или полуавтоматски дерези. За разлика од Trail Runnig, Hiking патиките и Hiking обувките, кај овој тип на планинарски обувки пред првото искачување е потребно нивно разгазување. Експертите препорачуваат двонеделно разгазување.

Mountaineering обувките се дизајнирани за високогорско планинарење во екстремни услови. За разлика од предходните, овој тип на планинарски обувки се повисоки, поседуваат голема термичка изолација, многу цврст ѓон и меѓуѓон. Кај Mountaineering обувките, помеѓу ѓонот и меѓуѓонот, често се вметнува и дополнителна челична прачка, која дава дополнителна цврстина на ѓонот при вертикални искачувања на глечери со дерези, вградени гамашни и држачи за автоматски дерези.

Правилниот избор на планиарските обувки секогаш нека ви биде на прво место. Доколку не знаете кој е правиот избор за вас одете до најблискиот Outdoor Shop, каде има стручни лица кои ќе ви помогнат во изборот на обувки. Соодветните обувки ќе ви овозможат комфорни планинарски тури и максимално уживање во природата!!!!

Не чекајте, опремата на Вас и се гледаме на некој од нашите прекрасни врвови!!! 🙂