На самиот почеток, водачот на делегацијата, Владимир Богоевски даде краток рекапитулар на постигнатите резултати на МОИ 2018 и истакна дека уште еден квалитет на младата Олимписка делегација во Буенос Аирес беше нивната сплотеност, другарство, повеќе од коректен меѓусебен однос, фер плеј и почитување и дека сите беа пример како треба и мора достоинствено и сложно да се однесува една идна Олимписка делегација.

Директорот на АМС, Дарко Каевски истакна дека Владата на Република Македонија ќе продолжи уште позасилено, посебно преку ваучерскиот систем, но и преку буџетот на АМС да ги финансира програмите на НСФ-и, а дека посебно ќе ги наградува врвните резултати на најдобрите македонски спортисти.

Претседателот Тупурковски истакна дека успехот на Фаик Весели е дотолу позначаен бидејќи тој е единствениот каратист од ЕВРОПА на овие Младински Олимписки игри во оваа тежинска категорија и дека тоа всушност значи дека Фаик е најдобриот Европски каратист, во својата возраст, во својата категорија.

Претседателот на МОК, д-р Васил Тупурковски и директорот на АМС, г-дин Дарко Каевски ги поздравија сите учесници на Младинските Олимписки игри, а посебно му го честитаа бронзениот медал на Фаик Весели и на неговиот тренер Александар Кузмановски (Карате). И двајцата ја потенцираа важноста од координираната и партнерска работа на АМС и МОК и дека во консултација и соработка со Националните спортски федерации, високите спортски резултати на најдобрите македонски спортисти ќе бидат повеќе од забележителни.