Воспалените мускули после интензивен мускулен напор е природна состојба (DOMS – Delayed onset muscle soreness или мускулфибер) која претставува позитивен репер за успешен завршен тренинг, но секогаш треба да ја разликуваме од другиот тип на болка предизвикана од повреди.

Пристапот на третирање е друг, степенот на сериозност е друг, а исходот ќе отиде во овој или оној правец само доколку ние реално согледаме што се случува со нашето тело и правилно постапиме понатаму. 

Еве неколку ситуации во кои можете да се најдете, а тие се исполнети со „добриот“ (адаптационен) тип на болка

1.Веќе сте запознаени со одредена активност, ја имате правено огромен број пати, но не сте ја правеле во последно време. Нормално е да постојат болки после таква сесија. 

2.Работите одредена вежба без никакви болки, тегоби или нелагодности, но одма после тоа осеќате како ви „жежат“ мускулите. Тоа е добро! Болка по правилно изведена вежба значи дека телото се адаптира. Фитнес адаптацијата преку мускулните воспаленија е нормална појава, а пиењето на аналгетици само може да го успори овој процес. 

3.Ваквото мускулно воспаление е нормално да трае помеѓу два до четири дена по тренингот. Спротивно на тоа што многу луѓе го прават, одмарање со денови додека да исчезне болката, потребно е да го активирате телото со полесни вежби со што ќе направите една активна рекуперација. 

Спротивно на погорниве, еве неколку ситуации каде што е застапен „лошиот“ тип на болка (повреди)

1.Понекогаш, погрешната изведба на некоја вежба деведува до потешкотии и болки на одредени регии. Доколку сте немале болки пред активноста, а потоа осетите додека ја правите, застанете и консултирајте се со тренерот или некој од поискусните вежбачи да ја оценат вашата техника и биомеханика додека ја изведувате.

2.Компензаторните повреди се честа појава. Секоја хронична и претходна повреда на грбот, колената или колковите може лошо да се пренесе на други делови од телото. Пример, повреда на скочниот зглоб може да ја доведе состојбата на колената во прашање. 

3.Локализираната повреда е знак дека нешто не е во ред. Пример, двете раце на бенч преса треба подеднакво да го носат товарот и подеднакво да даваат знаци на блага болка. Ако едната боли повеќе, тоа е знак за „црвено“ знаменце. 

4.Акутните, остри, неподносливи болки од нигде-никаде за време на тренингот се знак што треба сериозно да го земете во предвид и да се консултирате со стручно лице. Нема изговори, една навидум лесна повреда може да се влоши и да ве извади од треажниот процес, дури и неколку месеци.

5.Доколку и после периодот од два до четири дена, мускулното воспаление продолжи да перзистира (продолжи), можно е да претерувате со тренингот и да немате правилно дозирање и рекуперација. Максимален тренинг си бара максимален период на закрепнување.