Нема сомнеж во тоа дека протеините се главните хранителни макро-елементи во нашата исхрана кои се задолжени за градење на нашите мускули и подобрување на нашите резултати во теретана. Тие ги содржат основните градбени единици кои се важни за синтетизирање на мускулна маса.

Тука настанува првата грешка како последица на некое си логично размислување кое преовладува во тренирањето, дека повеќе протеин ќе ни дадат подобри резултати. Повеќе, не секогаш значи и подобро и покрај тоа што ова често ќе го слушате од страна. Во просек, на организмот му се потребни од 0,8 до 1,9 грами на килограм телесна тежина на ден (во зависност од типот на тренингот) што телото може да ги употреби во ткивната конструкција. Се што е внесено над оваа граница ќе отиде за џабе!

Времето кога најдобро е тие да се консумираат е некаде 45 минути до еден час после тренингот бидејќи тогаш има можност за најдобра рекуперација на мускулните влакна, но секогаш треба да се става акцент и на храната што се консумира, а не само на времето.

Примарната цел што треба да се исполни по вежбањето е телото да се засити со извор на шеќери со што би се спречило искористувањето на мускулното ткиво како енергија. Затоа најдобрата комбинација која треба да се консумира после вежбањето е јаглехидрати со висок GI во комбинација со протеини. Со ова, консумираните шеќери ќе ги поштедат сопствените енергетски извори, а протеините ќе овозможат репарирање на мускулното ткиво и ќе промовираат негово зголемување.

И немојте да бидете загрижени единствено за храната што ја јадете после тренинг бидејќи градењето на мускули зависи од целокупната диета, а не само од она што го консумирате еден час после дигање на тегови. Таа треба да го одржи балансот помеѓу катаболизмот (разградба) и анаболизмот (синтеза) на структурните делови од телото.

Затоа, фокусирајте се на целата дневна нутриција бидејќи протеинот сигурно ќе помогне во правењето на мускулната маса, но тој не е единствениот актер во целиот филм. Внимавајте на внесување регуларни количини на јаглехидрати и протеини во текот на целиот ден, а за да извадите максимум од тренингот, јадете оброк кој ќе содржи брзо-растворливи шеќери заедно со потребната количина на протеини еден час после тренингот.

Само со вака, правилно испланиран пост-тренинг оброк и балансирана исхрана во текот на целиот ден вие ќе можете да постигнете одлична мускулна синтеза.