Пазарот е преплавен со додатоци во исхраната кои ги имаат фитнес фанатиците за маркетиншка целна група. Од енергетски гелови, протеини во прав, па сè до протеински барови како замена за оброк, можете да најдете по нешто спакувано и обработено за секој тип на спортист, без разлика дали работите предоминантно на својата издржливост или сила. Но внимавајте и правилно селектирајте ја вашата основна исхрана.

За постигнување високи спортски резултати, на балансираната исхрана не треба да ѝ се посветуваме само после тренингот, вежбањето во фитнес клуб или пред голем настан. Тоа е нешто за што треба да бидете свесни при секој оброк и секоја ужина, а вашата стратегија треба да вклучува повеќе природна и сурова храна.

ЗЕЛЈЕСТ ЗЕЛЕНЧУК

Сите зеленчуци се одличен избор кога станува збор за снабдување на телото со витамини и минерали. Но оние со темни зелени листови и оние од фамилијата зелки (брокулите, карфиолот, проќељ и кељ) имаат особено висока концентрација на антиоксиданси и диетални влакна, неопходни за ослободување на телото од деструктивните слободни радикали. Како што важи и за овошјето битно е да се комбинираат зеленчуци со различни бои, но нека доминира зелената. / предлог рецепт

ЈАТКАСТИ ПЛОДОВИ 

Јаткастите плодови и нивните производи играат главна улога во исхраната на многу спортисти бидејќи се природна и одлична комбинација на протеини и здрави масти. Тие се исто така лесно сварливи, а помагаат и во балансирањето на шеќерните нивоа во крвта кога се комбинираат со јаглехидрати. Една шака на ден е одлична доза за сите физички активни лица. / предлог рецепт.

КИНОА

Иако спаѓа во сосема друга група растенија, по својата хранлива вредност киноата застанува рамо до рамо со сите целозрнести житарки, а можеби е и подобра од некои од нив. Содржи скоро два пати повеќе протеини од останатите житарки, а единствена е по тоа што ги содржи сите амино киселини, неопходни за телото да гради мускулна маса и да заздравува по напорно вежбање. Може да ја јадете како блага варијанта за појадок со цимет и мед, или како солено јадење, одлично го заменува оризот, па можете многу да екпериментирате. / предлог рецепт.

ЗРНЕСТО ОВОШЈЕ

Антиоксидантите како витамините А, Ц и Е, ви помагаат да се заштитите од оксидативен стрес и од слободните радикали кои се создаваат во телото за време на напорна физичка активност и токму затоа зрнестото овошје е најдобар избор.  Внесувајте го целиот спектар на бои, колку поинтензивно обоени, толку подобро, правете си смути, овошни салати, јадете ги свежи и цели. Внесувањето на многу антиоксиданти исто така помага во зачувување на мускулната сила. / предлог рецепт.

ЛОСОС

Масните риби како лососот, скушата и пастрмката се добар извор на протеини и омега-3 масни киселини кои помагаат да се намали воспалението. Имено воспалението е одговор на организмот на кој може да ја попречи спортската изведба и да допринесе за хронични заболувања.

Дивиот лосос е далеку поздрав отколку одгледуван во рибарниците, за што говорат неговата (не)достапност и цена, но како опција секако останува конзервираниот див лосос кој може да го комбинирате во чорби, сендвичи, салати или тестенини. Повеќето експерти се согласуваат дека морската храна е најдобро е да се конзумира два пати неделно во количина до 250 грами за максимална анти-воспалителна придобивка. Наш совет е да се држите до рибата и морските производи како извор на омега-3 и да заборавите на капсулите. / предлог рецепт

ГРАВ И ЗРНЕСТ ЗЕЛЕНЧУК

За спортистите вегетаријанци или оние кои од време на време не сакаат да конзумираат месо, растителниот извор на протеини е неопходен. Тука се вклучени сојата, тофуто, зрнестиот зеленчук, сите видови легуминози.

Зрнестите зеленчуци можеби не се толку богати со протеини како парче стек. Во една чаша грав има 7 грами протеини, наспроти 33 грами во иста количина пилешки гради. Но за разлика од животинските протеини, зрнестиот зеленчук не содржи заситени масти и е одличен извор на хранливи влакна кои ќе ве одржат сити подолго време. / предлог рецепт 

ТЕСТЕНИНИ

Протеините се можеби битни за градење на мускулна маса, но да не заборавиме и на јаглехидратите. Тие се сепак најбрзо и најефикасно гориво за нашите мускули. Може да согоруваме масти и протеини, но мора прво да ги претвориме во јаглехидрати што претставува само дополнителна работа за телото.

Тогаш какви видови на јаглехидрати треба да јадеме? Разновидните полнозрнести житарици се најчесто најдобар избор. Тие се побогати со хранливи влакна и имаат помалу шеќери отколку нивните преработени бели двојници. Меѓутоа вечерата пред битен натпревар најдобро е да биде лесно сварлива. На диеталните влакна им е потребно повеќе време за да поминат низ дигестивниот систем и може да предизвикаат стрес, затоа треба што повеќе да се намали нивниот внес пред голем спортски настан за непречен тек на изведбата. / предлог рецепт 

БАНАНИ

Со околу 100 калории по парче, бананите се богат извор на лесно сварливи шеќери и природни електролити. Не се толку практични како баровите или геловите, но се добра опција за оние луѓе кои бараат природна, непреработена алтернатива која ја има буквално истата функција. Тие се исто така омилена храна за закрепнување и тоа со добра причина. Една банана со средна големина содржи 442 мг калиум кој му е потребен на телото за да ги регулира течностите и да спречи појава на болка и грчеви во мускулите. Бидејќи калиумот се ослободува од телото преку потта за време на физичка активност, многу е битно истиот да се надополни што е можно побрзо по вежбањето. Не ги изоставувајте овие брзи бустери на енергија за корегирање на електолитниот дисбаланс после интензивно потење. / предлог рецепт