На 22 јуни во недела со почеток во 09.00 часот од Ресен тргнува велосипедската „Тур де Галичица”. Турата е во должина од 71 километар која што е составена од 35 км. асфалт и 36 км. земја и вкупна денивелација од 980 метри. Добредојден е секој што има желба за добра авантура и откривање на прекрасните терени на оваа планина.

Задолжителни елементи за безгрижно присуство: желба за вртење педали на планина, спремно и стегнато точаче со некој алат за менување гума и слично, кацига обавезно, а се` останато ќе си дојде на место.

Во продолжение ја имаме и рутата:

Турата започнува од Ресен па се упатуваме кон Отешево, пред Стење на 20 км вртиме за Галичица, а оттука имаме добри 15 км качување кон поранешните скијачки терени. Од ски терените почнува земјениот пат и води до селото Болно и на патот за Ресен.

За оние кои си сакаат шатор и спиење на отворено ќе биде организирано кампче во селото Стење откаде ќе може да се посети познатото Коњско, а вечерта не очекува журка.

Турата е отворена за секого и не се плаќа никаков стартен пакет. Секој учествува и вози на своја одговорност.