Инфо

ДПС Трансверзалец на ден 20.08.2017 (Недела) организира искачување на единаесетиот по ред врв во рамки на предизвикот 12 Врвови – врвот Семир Кајас висок 1.877 мнв кој се наоѓа на планината Беласица.

Семир Кајас познат уште како Звезден Врв е еден од најимпресивните врвови на Беласица и нуди воодушевувачки поглед на околината. Во негова близина се наоѓа и врвот Тумба кој е тромеѓа меѓу Македонија, Бугарија и Грција. Учесниците ќе уживаат во природните убавини на Беласица со посебен акцент на изобилството капини, малини, дива брусница, боровинки и јагоди кои ги има насекаде долж патеките.

До планината Беласица се пристигнува од Струмица до село Смолари (28 км). Планинарската патека започнува од село Смолари во чија близина се наоѓа познатиот „Смоларски водопад”. На почетокот на селото се оди по широк пат, после 15 минути пешачење се напушта широкиот пат, и се влегува во шума се до планинарски дом Шарена Чешма (потребни се 2 – 2.5 часа до Шарена Чешма). Од домот Шарена Чешма до врвот Семир Кајас (1.877 мнв) се пешачи 1.5 – 2 часа. Еднодневна маршрута од с. Смоларе- Смоларски водопад-планинарски дом Шарена Чешма – врв Семир Кајас и назад по истата патека е во должина од 18км со висинска разлика за искачување D+ 1500 метри.

Еднодневна акција – Програма

Недела 20.08.2017 год.

• 05ч. Поаѓање од Скопје – Пошта 2 Железничка Станица
• 8ч. Тргнување од с.Смоларе (360 мнв) кон планинарски дом Ш.Чешма (1.300 мнв)
• Посета на Смоларски водопад (600 мнв).
• 10-11ч. Пристигнување во планинарски дом Ш. Чешма и одмор
• 12-14ч. Искачување до врвот Семир Кајас 1.877 мнв
• 15-16ч. Враќање во планинарскиот дом Ш. Чешма и одмор
• 16ч. Тргнување од планинарскиот дом Ш. Чешма
• 18ч. Пристигнување во с.Смолари
• 19ч. Враќање за Скопје

Единаесетиот предизвик ќе овозможи да изберете Еднодневна или Дводневна акција со интересна програма на прекрасната Беласица. Во наведениот датум домаќините на планинарскиот дом Шарена Чешма, ПАОК Ентузијаст од Струмица истиот викенд организираат Меѓународна планинарска средба “Балкан без граници” на планината Беласица на кој се искачуваат два врва: врвот Тумба (1.881 мнв) и врвот Семир Кајас (1.877 мнв). ДПС Трансверзалец ќе ви овозможи според вашите желби и можности, двовневна акција за уживање на Беласица со тоа што ќе ja прилагоди програмата според организацијата на ПАОК Ентузијаст од Струмица. Во дводневната акција може да изберете дали ќе искачите еден или два врва. Во рамки на предизвикот “12 Врвови” битно е да го искачите врвот Семир Кајас.

Дводневна акција – Програма

Сабота 19.08.2017 год.

• 07ч. Поаѓање од Скопје – Пошта 2 Железничка Станица
• 10ч. Тргнување од с.Смоларе (360мнв) кон планинарски дом Ш.Чешма (1.300 мнв)
• Посета на Смоларски водопад (600 мнв).
• 12-13ч. Пристигнување во планинарски дом Ш. Чешма (1.300 мнв)
• 14-15ч. Одмор и ручек
• 16-20ч. Можност за Искачување до врвот Семир Кајас (1.877 мнв) или прошетка во околината на домот
• Спиење во сопствени шатори – секој да си обезбеди сопствен шатор

Недела 20.08.2017 год.

• 06ч.Тргнување од планинарски дом Ш. Чешма (1.300 мнв)
• 09ч. Пристигнување на врвот Тумба (1.881 мнв). На врвот се наоѓа тромеѓата меѓу Македонија, Бугарија и Грција.
• 09-12ч. Средба на планинари – Балкан без граници организиран од ПАОК Ентузијаст од Струмица
• 12-14ч. Од врвот Тумба (1.881 мнв) упатување кон врвот Семир Кајас (1.877 мнв)
• 15-16ч. Враќање кон планинарски дом Ш. Чешма и одмор
• 16ч. Тргнување од планинарскиот дом Ш. Чешма
• 18ч. Пристигнување во с. Смолари
• 19ч. Враќање за Скопје

Секој учесник во акцијата учествува на сопствена одговорност и одговара за сопствената психофизичка спремност. Учесниците во акцијата задолжително треба да обезбедат сопствени шатори, сопствен прибор за јадење. Храната е од ранец. Извори на вода има на почетокот на патеката, пред Смоларски Водопад и во планинарскиот дом Шарена Чешма. Понесете најмалку 1.5л вода. Превозот ќе биде организиран со комбиња и автобуси.

Задолжително носење на разгазени планинарски чевли, кабаница, планинарски стапчиња, заштитна капа, заштитен фактор, соодветна облека за топло време но и за променливо врнежливо, челна ламба.

Цена на превоз за Еднодневната акција 600 денари (100 денари одат за организацијата на предизвикот).
Цена на превоз за Дводневната акција 800 денари (100 денари одат за организацијата на предизвикот).

Се молат сите останати учесници и посетители кои ќе одат со сопствен превоз, да уплатат учество во акцијата од 100 денари, кои ќе се искористат за: изработување на значките и обезбедување на наградите за предизвикот „12 Врвови”, организирање голема 2 дневна забава на крајот на предизвикот, печатење маици, бележење и маркирање на планинарските патеки по кои ги искачуваме врвовите.

Пријавување и набавка на карти најдоцна до 17.08.2017.
Информации за акцијата на тел 070/641 – 998 Зоран Костадинов и во просториите на Планинарско Друштво Трансверзалец секој четврток од 20:00 до 21.30ч.

Пријавување и набавка на карти за акцијата: во продавницата пред студенсткиот дом Кузман Јософовски Питу секој ден од 10 до 21ч., на редовен состанок на друштвото секој Четврток од 20 до 21.30ч. и во Книжара на Студентски Збор од 09.00 до 19.00 ч. Контакт телефон 071/591- 260

Се замолуваат сите оние пријавени предизвикувачи на кои ова ќе им биде 3 освојување на врв од предизвикот, да се пријават за да добијат маица со логото на предизвикот, која следува како награда за 3 искачени врвови.